«Экстрэмісцкі» спіс Мінінфарма: YouTube-канал «ЧестнОК-Live», Instagram журналіста Яраслава Пісарэнкі і TikTok-акаўнт «Радыё Ўнэт»

Увечары 16 красавіка Міністэрства інфармацыі абнавіла ў чарговы раз «Рэспубліканскі спіс экстрэмісцкіх матэрыялаў».

Журналіст Яраслаў Пісарэнка. Фота: з уласнага архіва

Сярод іншых інтэрнэт-рэсурсаў у пералік забароненых да распаўсюду ўключылі YouTube-канал «ЧестнОК-Live» (ідэнтыфікатар youtube.com/@chestnok_live). Гэта аўтарскі праект  беларускага журналіста, былога палітвязня Аляксандра Івуліна, відэаканал мае больш за 6 тысяч падпісчыкаў. Адпаведнае рашэнне ў дачыненні да «ЧестнОК-Live» прыняў 10 красавіка 2025 года суд Бешанковіцкага раёна Віцебскай вобласці.

Рашэннем суда Чыгуначнага раёна Гомеля ад 14 красавіка 2025 года «экстрэмісцкай інфармацыйнвай прадукцыяй» прызнаны акаўнт у сацсетцы Insta­gram з назвай pisarenko_jr (ідэнтыфікатар instagram.com/pisarenko_jr). Гэтая старонка належыць спартыўнаму журналісту Яраславу Пісарэнку.

У той самы дзень суд Чыгуначнага раёна Гомеля пастанавіў лічыць «экстрэмісцкай» і старонку ў Tik­Tok з назвай radiounet  (ідэнтыфікатар tiktok.com/@radiounet). Гэта адзін з інтэрнэт-рэсурсаў праекта «Радыё Ўнэт», які праіснаваў амаль чатыры гады як частка польскага Radio Wnet.

Раней, 4 ліпеня 2023 года, суд Чыгуначнага раёна Гомеля ўжо прызнаваў «экстрэмісцкімі матэрыяламі» іншыя рэсурсы радыёпраекта: сайт radiounet.fm, старонкі ў Insta­gram, Face­book, Twit­ter, Telegram-канал з назвай «Радыё Ўнэт | Radio Unet» і YouTube-канал з такой самай назвай.