Памерла пісьменніца і журналістка Святлана Курс

20 ліпеня сышла з жыцця пісьменніца і журналістка Святлана Курс. Ёй было 54 года. У апошні час яна змагалася з анкалагічным захворваннем.

Святлана Курс. Фота: яе старонка ў Face­book

Пра смерць Святланы стала вядома з паведамлення ў Face­book, апублікаванага яе сынам і мужам.

«Сям’я Святланы Курс з бязмерным смуткам паведамляе пра яе заўчасны зыход з жыцця. Пра час і месца развітання са Святланай паведамім дадаткова», — гаворыцца ў допісе.

Святлана Курс (псеўданім — Ева Вежнавец) — пісьменніца, перакладчыца, рэдактарка і журналістка. Нарадзілася ў 1972 годзе ў вёсцы Загалле Мінскай вобласці, скончыла філфак БДУ. У літаратуру прыйшла праз журналістыку:  у 1990‑я і 2000‑я гады Святлана Курс актыўна супрацоўнічала з незалежнымі беларускімі медыямі. Працавала ў «Нашай Ніве», а пасля 13 гадоў на Еўрарадыё. 

З 1996 па 1999 годы была галоўнай рэдактаркай часопіса Беларускага Хельсінкскага камітэта «Чалавек». Аўтарка публікацый у выданнях «Наша Ніва», «Свабода», «ARCHE», «Наша гісторыя», «Дзеяслоў», арт-праекце «Партызан», а таксама на Радыё Свабода, Еўрарадыё і тэлеканале Белсат.

У першым нумары часопіса «ARCHE» за 1998 год быў апублікаваны яе першы аповед «Мы, два хохлікі». У 2008 годзе ў кнігарні «Наша Ніва» выйшаў зборнік апавяданняў «Шлях дробнага падлюкі». У 2015 годзе ў «Нашай Ніве» быў апублікаваны яе аповед «Параска і яе чорны бык» не пад псеўданімам, а пад сапраўдным прозвішчам.

Святлана Курс шырока вядомая як аўтарка прозы, якая глыбока даслядуе беларускую рэчаіснасць, чалавечыя лёсы і памяць. Яе творы атрымалі прызнанне як у Беларусі, так і за яе межамі.

Найбольш вядомая кніга пісьменніцы — «Па што ідзеш, воўча?», якая ў 2021 годзе атрымала Прэмію Ежы Гедройця, а пазней была перакладзена на іншыя мовы.

Беларуская асацыяцыя журналістаў выказвае шчырыя спачуванні родным і блізкім Святланы Курс.