У Варшаве адбудзецца фестываль нямога кіно пад жывую музыку

Фестываль «Нямая ліхаманка» другі раз пакажа прызнаныя шэдэўры і малавядомыя стужкі эпохі нямога кіно ў суправаджэнні жывой музыкі беларускіх і польскіх кампазітараў. У праграме ёсць і беларуская стужка. Паказы будуць адбывацца з 1 да 17 верасня ў дворыку камяніцы ў цэнтры Варшавы пры Музеі Вольнай Беларусі і Цэнтры думкі Яна Паўла II (Fok­sal, 11). 

У праграму ўвайшлі стужкі з ЗША, Францыі, Нямеччыны і Беларусі. Музыку адмыслова да гэтых фільмаў напісалі беларускія кампазітары Вольга Падгайская і Канстанцін Яськоў, польская кампазітарка Александра Хмелеўска. Фільм адкрыцця, якім станецца камедыя Бастэра Кітана, будзе паказвацца ў суправаджэнні класічнага тапёра. У гэтай ролі выступіць Канстанцін Гарачы — беларускі піяніст-віртуоз, вядомы як сузаснавальнік джазавага гурта Apple Tea.

«Нямыя фільмы не былі сапраўды нямымі — яны гучалі дзякуючы музыцы.

Сёння эпоха нямога кіно амаль цалкам выключаная з увагі публікі, і для нас асабліва каштоўна, што на нашым фестывалі мы даем гэтым стужкам новае прачытанне і новае жыццё. Кампазітары Вольга Падгайская і Віталь Эпаў, якія адказваюць за музычную частку, забяспечваюць для фільмаў «Нямой ліхаманкі» прафесійнае і аўтарскае музычнае асэнсаванне.

Мы таксама захоўваем аб’яднаўчы характар фестывалю і запрашаем да супрацы польскіх калегаў ды паказваем карціны з розных краінаў», — кажа арганізатарка фестывалю, кінакрытыца Ірэна Кацяловіч.

Уваход на паказы вольны. Усе фільмы будуць суправаджацца субцітрамі на беларускай і польскай мовах.

ПРАГРАМА:

1 верасня, 20.00: «Кінааператар» — ЗША (1928)

Першая камедыя легендарнага коміка Бастэра Кітана, адной з ключавых постацяў сусветнай кінакамедыі, знятая для студыі Metro-Gold­wyn-May­er. Хаця гэтая супраца сталася пачаткам абмежавання творчай свабоды Кітана, «Кінааператар» многімі ўважаецца найлепшай камедыяй з ягоным удзелам. У рэчышчы «кіно пра кіно» стужка расказвае гісторыю маладога чалавека, які намагаецца ўладкавацца кінааператарам на MGM, каб быць бліжэй да дзяўчыны, у якую закаханы.

Рэжысёры: Бастэр Кітан, Эдўард Сэджўік Тапёр: Канстанцін Гарачы — фартэпіяна 

Працягласць: 70 хвілін

3 верасня, 20.00: «Пакуты Жанны д’Арк» — Францыя (1928)

Адзін з найвялікшых фільмаў у гісторыі нямога кіно і кінематографу агулам. Дацкі рэжысёр Карл Тэадар Драер паказвае ў ім апошнія дні нацыянальнай гераіні Францыі Жанны д’Арк. Фільм быў забаронены да паказу ў Вялікай Брытаніі праз некампліментарныя вобразы брытанскіх салдатаў. На фестывалі будзе паказаная версія фільму ў арыгінальным мантажы. Яна доўга лічылася страчанаю, пакуль не была знойдзеная ў 1981 годзе ў каморы псіхіятрычнай клінікі ў Осла.

Рэжысёр: Карл Тэадар Драер Кампазітар: Канстанцін Яськоў

Выканаўцы: Канстанцін Яськоў — фартэпіяна, Палiна Горбач — віяланчэль 

Працягласць: 80 хвілін

10 верасня, 20.00: «Кабінет доктара Калігары» — Нямеччына (1920)

Культавы твор нямецкага экспрэсіянізму ў жанры горару і адзін з самых уплывовых фільмаў у гісторыі сусветнага кіно. Таямнічы гіпнатызёр просіць у мэрыі дазволу паказаць на мясцовым кірмашы незвычайнага персанажа — Самнамбулу. Пазней капрызнага чыноўніка, які не надае належнай увагі і павагі візіцёру, знаходзяць забітым у ягонай спальні. Адна смерць ператвараецца ў серыю таямнічых забойстваў…

Рэжысёр: Робэрт Вінэ Кампазітарка: Вольга Падгайская

Выканаўцы: Вольга Падгайская — арган, Кузьма Папакуль — 1‑я скрыпка, Анастасія Пятрова — 2‑я скрыпка, Віталь Эпаў — сапрана-саксафон (Five-Storey Ensem­ble)

Працягласць: 75 хвілін

17 верасня, 20.00: «Суд павінен працягвацца» — Беларусь (1930)

Гэта адна з цэлай серыі беларускіх стужак 1920–1930‑х гадоў, прысвечаных праблеме жаночай эмансіпацыі. У кантэксце «Нямой ліхаманкі» яна сэнсава працягне мінулагодні паказ «Прастытуткі». Фільм распавядае пра судовы працэс над пяццю мужчынамі, якія абвінавачваюцца ў згвалтаванні лабаранткі электразаводу Алены, а таксама пра вяртанне ахвяры да паўнавартаснага працоўнага жыцця.

Рэжысёры: Яфім Дзіган, Барыс Шрэйбер Кампазітарка: Александра Хмелеўска

Выканаўцы: Александра Хмелеўска — фартэпіяна/электроніка, Філіп Спорняк — віяланчэль

Працягласць: 63 хвіліны

Фестываль адбываецца пры фінансавым падтрыманні фонду Trzy Trą­by, Ger­man Mar­shall Fund Злучаных Штатаў Амерыкі (GMF), Цэнтру дыялогу імя Юльюша Мерашэўскага, Старамейскага дома культуры і пры ўдзеле Музея Вольнай Беларусі, Цэнтру думкі Яна Паўла II — культурнай установы сталіцы Варшавы ды Беларускай незалежнай кінаакадэміі.