Фота: сацсеткі
Пра гэта паведамляе Iran International са спасылкай на адваката апазыцыянэра Аміра Раісіяна.
Шанбехзадэ напісаў свой твіт у траўні. Праз некалькі тыдняў, пасьля таго, як твіт набраў значна больш лайкаў, чым пост Хамэнэі, мужчыну арыштавалі.
31 жніўня адвакат Шанбехзадэ паведаміў, што яго падабаронны прыгавораны да пяці гадоў «за прапаганду на карысьць Ізраіля», да чатырох — «за абразу ісламскіх сьвятыняў», да двух — за «распаўсюджваньне ілжывай інфармацыі» і да яшчэ аднаго года за «антыдзяржаўную прапаганду» .
Як распавёў Раісіян, з 12 гадоў тэрмін Шанбехзадэ павінен правесьці ў турме пяць, пасьля чаго зможа падаць прашэньне аб умоўна-датэрміновым вызваленьні. Адвакат спадзяецца абскардзіць прысуд.
Па словах адваката, абвінавачаньне не даказала віну Шанбехзадэ па самым цяжкім артыкуле. У якасьці доказаў віны па іншых артыкулах суд прывёў яго посты ў падтрымку палітвязьняў і адмены абавязковага нашэньня хіджабу, выкарыстаньне хэштэга «#НеПакараньнямСьмерці», крытыку іранскіх выбараў і выказваньне радасьці з нагоды сьмерці былога прэзыдэнта краіны Эбрахіма Раісі.
У 2019 годзе Шанбехзадэ ўжо трапляў у турму — гэта адбылося пасьля пратэстаў, якія пачаліся з‑за шматразовага павелічэньня цэнаў на паліва ў Іране. Тады апазыцыянэра абвінавацілі ў абразе сьвятыняў і лідэра Ісламскай рэспублікі, а СМІ, зьвязаныя з Корпусам вартавых ісламскай рэвалюцыі, пісалі, што ён агент Масада.
Як адзначае Iran International, крытыкі іранскага рэжыму часта выкарыстоўваюць кропку і іншыя адзіночныя сымбалі, каб выказаць нязгоду з уладамі.
