“Адчуваюць сябе нядрэнна, наколькі гэта магчыма ў зняволенні” — З чым ідуць у новы год нашы калегі-палітвязні

Юрый Ганцарэвіч

Пра затрыманага сёлета ў красавіку Юрыя Ганцарэвіча, журналіста баранавіцкага медыя Intex-Рress, апошнія навіны былі ў кастрычніку.

Юрый атрымаў два з паловай гады за садзейнічанне экстрэмісцкай дзейнасці.

Коллеги в тюрьмах. Напишите им письмо поддержки АКТУАЛЬНЫЕ АДРЕСА

Павел Мажэйка

Кіраўніка гродзенскага “Цэнтра гарадскога жыцця”, журналіста Паўла Мажэйку затрымалі ў жніўні.

Па словах родных, усе гэтыя чатыры месяцы нічога не адбываецца. На самым пачатку Павел перахварэў. У гарадзенскім СІЗА шмат палітзняволеных, таму Павел часта сустракаецца з тымі, з кім быў у добрых стасунках на волі.

Чамусьці не перадаюць кнігі, хоць родныя і сябры іх дасылалі.

Даходзяць лісты ад сям’і, ад сяброў — з пераменным поспехам паштоўкі. Павел вельмі ўдзячны ўсім, хто дасылае грашовыя пераводы. Нейкіх зрухаў у следстве родныя чакаюць пасля Новага года. На цуд не спадзяюцца.

Дзяніс Івашын

Журналіст “Новага часу” Дзяніс Івашын адбывае тэрмін. Па двух крымінальных артыкулах: “Умяшанне ў дзейнасць супрацоўніка ўнутраных спраў” і “Здрада дзяржаве” вязень атрымаў 13 год і адзін месяц.

Родныя кажуць, што Дзяніс трымаецца бадзёра, у настроі. Мяркуе, што днямі могуць перавесці з СІЗА, але куды, пакуль невядома. Адчувае сябе добра, спадзяецца на лепшае ў наступным годзе, але ў прагнозах асцярожны.

Аляксандр Любянчук

Да трох гадоў зняволення ў кастрычніку прыгаварылі журналіста Аляксандра Любянчука. Па словах родных, агулам у яго ўсё нармальна.

Адзінае, нядаўна перахварэў і крыху здаў маральна.

Валерыя Касцюгова

Палітолаг і аналітык Валерыя Касцюгова за кратамі ў СІЗА ад 20 чэрвеня 2021 года. Яе абвінавачваюць па трох крымінальных артыкулах.

Па інфармацыі сваякоў, настрой Валерыі па-ранейшаму бадзёры. Умовы нармальныя. Нядаўна было некалькі спатканняў.

Кацярына Андрэева

Журналістка за кратамі больш за 25 месяцаў. Ад гэтага, па словах родных, адчувае велізарную эмацыйную і фізічную стомленасць.

Адбілася турма і на здароўі — за час зняволення ў Кацярыны пагоршыўся зрок. Але ў цэлым калега адчувае сябе нядрэнна, наколькі гэта магчыма ў зняволенні. Трымаецца, не губляе веры і надзеі, піша лісты, складае вершы, чытае кнігі, калі ёсць час. Але часу ў калоніі значна менш, чым у СІЗА.

Нядаўна Кацярына страціла адваката Уладзіміра Пыльчанку. Яго пазбавілі ліцэнзіі. Гэта сумна, кажуць родныя. Але без абаронцаў журналістка не засталася. З гэтым праблем няма.

Андрэй Кузнечык

Нядаўна перадаў вестку на волю журналіст-фрылансер Андрэй Кузнечык. Мужчына патлумачыў, чаму застаўся ў Беларусі.

Андрэй сказаў: “У цяперашніх умовах меншай пакутай адбыць у вязніцы прыдуманы тэрмін, чым развітацца з радзімай на няпэўны (аж да скону) час (хоць тут я магу фатальна памыляцца ў тым, наколькі далёка могуць зайсці рэпрэсіі)”.

Паводле адваката, нядаўна асуджаны на чатыры гады журналіст Дзмітрый Лукша, годна трымаўся на судзе. А суд над нашым калегам Андрэем Пачобутам зноў перанеслі.

Канстанцін Залатых

Дырэктара газеты “Белорусы и рынок” Канстанціна Залатых затрымалі сёлета 18 мая пасля ператрусу ў рэдакцыі. 

Навін ад яго па-ранейшаму няшмат. Па словах родных, настрой у вязня нармальны. Лісты ён атрымлівае толькі ад сям’і. А што будзе далей, невядома.

Ірына Леўшына, Дзмітрый Наважылаў, Андрэй Аляксандраў і Ірына Злобіна

Пасля вынясення прысудаў фігурантаў «справы БелаПАН» перавялі з мінскага следчага ізалятара ў СІЗА Віцебска і Гомеля.

Так, Андрэй Аляксандраў і Дзмітрый Наважылаў — у ізалятары ў Віцебску, Ірына Леўшына і Ірына Злобіна — у Гомелі.

Па словах калег, журналісты чакаюць разгляду апеляцыі прысуду ў Вярхоўным судзе.

Разгляд мае адбыцца 6 студзеня 2023 года.

Андрэй Скурко

Хутка будзе паўтара года, як за кратамі журналіст “Нашай Нівы” Андрэй Скурко. Ён адбывае тэрмін — два з паловай гады. Па словах родных, Андрэй у парадку, наколькі гэта магчыма. Пастаянна перадае прывітанне і абдымкі ўсім, хто за яго перажывае.

Ён некалі пастанавіў, што ў любой сітуацыі, у любых абставінах трэба сачыць за здароўем цела і душы і прытрымлівацца гэтага напрацягу ўсяго зняволення.

Чалавек, які сустракаўся з ім нядаўна, кажа, што Андрэй спакойны і мудры, і гутарыць з ім — задавальненне. Іншы чалавек казаў, што ў яго свецяцца вочы. Родныя ведаюць: Андрэй стараецца пражыць гэты час максімальна спакойна і сабрана. Ён некалі пісаў, што гэтыя выпрабаванні — неабходны этап сталення нацыі. А яшчэ, магчыма, зусім хутка пабачыць свет Андрэеў пераклад “Айбаліта” “Доктар Будзьздароў”.

Коллеги в тюрьмах. Напишите им письмо поддержки АКТУАЛЬНЫЕ АДРЕСА

Чытайце яшчэ:

Журналісты рэгіянальных медыя: «Для многіх нашых чытачоў важна хаця б ведаць, што незалежныя СМІ яшчэ існуюць»

«І нават у гэты змрочны час мы робім якасны кантэнт, за які не сорамна» — калегі пра вынікі года

Падзелішся паролем ад Netflix‑у? Хутка гэта стане немагчымым