Анджэй Пачобут — сярод прызёраў конкурсу Grand Press

У Варшаве, у Музеі гісторыі Польшчы, адбылося ўручэнне прэміі Grand Press Awards – найбуйнейшага журналісцкага конкурсу краіны. Сярод прызёраў – беларускі палітвязень Анджэй Пачобут.

Анджэй Пачобут. Фота: Вольга Корсун

За званне «Журналіст года» галасавалі 88 рэдакцый польскай прэсы, радыё, тэлебачання і Інтэрнэту.

У выніку галасавання званне журналіста 2024 года атрымаў Анджэй Андрысяк, старшыня Таварыства мясцовых газет і выдавец «Gaze­ty Radom­szcza­ńskiej». За ім апынуліся: Рэната Кім («Newsweek Pol­s­ka») на другім месцы, Юстына Добраш-Орач (TVP) на трэцім месцы, Анджэй Пачобут на чацвёртым месцы і Патрык Словік (WP) на пятым.

Узнагароду ад імя Анджэя Пачобута атрымаў леташні Журналіст года Войцех Чухноўскі, які падзякаваў публіку за тое, што яна памятае рэпрэсаванага ў Беларусі журналіста.

«Дзякуй, што памятаеце. Мы ведаем, наколькі ён незламаным застаецца ў турме. Часам мы губляем надзею і маем шалёныя думкі. Мы працуем афіцыйна і неафіцыйна. Спадзяюся, гэты кашмар скончыцца. Учора Лукашэнка вызваліў яшчэ некалькі чалавек, але Анджэя сярод іх не было. Немагчыма ўявіць, што перажывае ён і ягоная сям’я. Дзякуй, што памятаеце», – сказаў журналіст «Gaze­ty Wybor­czej».

Вядомага гарадзенскага журналіста, актывіста польскай меншасці Анджэя Пачобута затрымалі 25 сакавіка 2021 года ў Горадні, асудзілі на 8 гадоў зняволення за журналісцкія матэрыялы і этапавалі ў самую жорсткую калонію Беларусі. З сёлетняга 26 лютага пра яго няма ніякіх вестак. Усе гэтыя тры гады ён зазнае ціск і катаванні, яму не перадаюць неабходных лекаў, нягледзячы на праблемы з сэрцам. І ўвесь гэты час вызваліць журналіста спрабавала польская дыпламатыя, аднак пакуль безвынікова.

«На месцы Ігара Ільяша мог быць кожны з нас». У Вільні назвалі пераможцаў праваабарончай прэміі