Заўсёднік прэс-канферэнцый і іншых афіцыйных мерапрыемстваў Герман Напольскі добра знаёмы сярод журналістаў.
Цяпер Герман, які звычайна называў сябе супрацоўнікам «Евразийской правды», друкуецца ў прапагандысцкім выданні «Мінская праўда». Аднак апошнім часам яго заўважаюць то ў Варшаве, то ў Вільні.
Як стала вядома БАЖ, за апошнія некалькі месяцаў аўтар прапагандысцкага выдання Герман Напольскі неаднойчы наведаў Вільню і Варшаву.
Ён мэтанакіравана прапануе журналістам недзяржаўных медыяў у эміграцыі сустрэчы, просіць іх пра рознага роду паслугі. Так, адзін з нашых суразмоўцаў паведаміў:
— Ад яго неаднаразова і настойліва паступалі прапановы такога кшталту: калі будзеш на канферэнцыі [Святланы] Ціханоўскай, ці можаш усё, што запішаш, скінуць мне? Разумееш, я неакрэдытаваны, а хацеў бы напісаць. Дзе буду апублікаваць? Знайду... Выглядае наіўна, але ў той жа час навязліва. Толькі за сёння ён напісаў некалькі падобных паведамленняў.
У адказ на заўвагі, што друкуецца ў праўладных выданнях, Герман Напольскі запэўнівае: нібыта асвятляе падзеі ўсебакова. Таксама ён хацеў уладкавацца ў польскае медыя і планаваў атрымаць рэкамендацыі ад супрацоўнікаў незалежных СМІ.
Падчас апошняга візіту ў Варшаву праўладны журналіст спрабаваў патрапіць на форум Асацыяцыі беларускага бізнэса за мяжой (ABBA), але яму не пашчасціла ў гэтым пачынанні.
Аднак, як паведамляюць калегі, хаця аўтара «Мінскай праўды» не пусцілі ў залю, ён усё ж такі працуе на форуме. У доказ гэтых словаў сведкі даслалі фатаграфію: Герман Напольскі сядзіць на канапе, на яго каленях — ноўтбук.
Цікава, што раней ён даволі адназначна выказваўся наконт палітыкі Польшчы. Так, у артыкуле пра музей савецка-польскай баявой садружнасці ў аграгарадку Леніна (Горацкі раён) ёсць такія радкі:
— Гэты музей наглядна паказвае, што ў той час, калі ў Польшчы зносяць помнікі савецкім салдатам, якія вызвалілі свет ад карычневай чумы, у Беларусі свята шануюць памяць аб усялякай дапамозе ў барацьбе з фашызмам.
З сакавіка 2022 года Герман Напольскі перыядычна друкуецца ў прапагандысцкім выданні «Мінская праўда». Звычайна за яго подпісам выходзяць публікацыі пра «Славянскі базар», узаемаадносіны ўладаў Расеі і Беларусі, праўладныя мерапрыемствы.
Беларуская асацыяцыя журналістаў не ведае, з якімі яшчэ медыя і органамі супрацоўнічае Герман Напольскі, але лічыць неабходным папярэдзіць калег.
Чытайце яшчэ:
«Прапаганда пераабуецца імгненна, ім ня так важна, што гаварыць. Быў бы загад», — Быкоўскі
Рыгор Азаронак будзе выкладаць у Полацкім дзяржаўным універсітэце
Закладнік уласнай сістэмы. Чаму прапаганда так нязграбна рэагавала на знікненне Лукашэнкі