Блогера Сяргея Ціханоўскага зноў асудзілі на 15 сутак. Агулам у ізалятары ён правядзе месяц

Сяргей Ціханоўскі ў судзе 10 студзеня 2020 года. Фота: Мікола Бянько

Ціханоўскага прывезлі на суд з ізалятара часовага ўтрымання УУС Гомельскага аблвыканкама, дзе ён адбываў 15-суткавы арышт за прысутнасць на мітынгу ў сталіцы на пачатку снежня. 11 студзеня блогер мусіў выйсці на волю, але ўлады “накінулі” яму новы адміністрацыйны арышт.

Ціханоўскі будзе пад вартай да 26 студзеня.

Падчас знаходжаня на сутках адміністрацыя ізалятара адмовілася прыняць ад праваабаронцаў для Сяргея Ціханоўскага  ваду, сокі і шакалад, не дазваляла яму сустрэцца з адвакатам.

Нагадаем, што раніцай 27 снежня на трасе М5 каля вёскі Лебядзёўка супрацоўнікі Жлобінскай ДАІ затрымалі Ціханоўскага, калі ён ехаў на аўтамабілі прыяцеля ў Мінск. Збіраўся рабіць у сталіцы здымкі для свайго канала “Страна для жизни” на YouTube. Міліцыянты даводзілі, што аўтамабіль, на якім едзе блогер, аб’яўлены Веткаўскім РАУС у вышук.

Відавочна, што сапраўднай мэтай затрымання была дастаўка Сяргея Ціханоўскага ў суд Савецкага раёна Гомеля, дзе яго і пакаралі першым арыштам за ўдзел у мірнай вулічнай акцыі ў абарону незалежнасці Беларусі.

Самыя важныя навіны і матэрыялы ў нашым Тэлеграм-канале — падпісвайцеся!