Дзве журналісткі, арыштаваныя падчас іранскіх пратэстаў, асуджаныя на вялікія тэрміны
24 кастрычніка 2023
Вялічэзныя турэмныя тэрміны, якія выносяць журналістам за іх прафесійную дзейнасць, гэта данасць не толькі ў Беларусі. У Іране такія цынічныя меры практыкуюцца даўно. Апошні выпадак гэта толькі пацвярджае. Там асуджаныя рэпарцёркі, якія асвятлялі гібель 22-гадовай дзяўчыны і пратэсты, якія ўзніклі пасля гэтага.
Журналістка іранскай газеты Ham-Mihan Элаха Махамадзі і яе калежанка Нілафар Хамідзі з выдання Al Sharq (арабская штодзённая газета, якая выдаецца ў Катары) былі арыштаваныя ў пачатку іранскіх пратэстаў у 2022 годзе. Цяпер ім вынеслі суровыя прысуды, паведамляе праваабарончая арганізацыя Hengaw (заснавана ў 2016 годзе, адсочвае сітуацыю ў курдскіх раёнах на захадзе Ірана).
Элах Махамадзі прысудзілі 6 гадоў турэмнага зняволення «за супрацоўніцтва з варожай краінай ЗША», 5 гадоў — «за змову супраць бяспекі краіны» і год — «за прапаганду супраць бяспекі краіны».
Аналагічныя фармулёўкі выкарыстаны ў абвіавачваннях да яе калежанкі. Нілафар Хамідзі прысудзілі 7 гадоў турэмнага зняволення «за супрацоўніцтва з варожай краінай ЗША», 5 гадоў — «за змову супраць бяспекі краіны» і год «за прапаганду супраць Ісламскай Рэспублікі Іран».
Калі гэтыя прысуды будуць пакінутыя ў сіле ў апеляцыйным судзе, Элаха Махамадзі правядзе ў няволі 6 гадоў са свайго агульнага 12-гадовага тэрміну, а Нілафар Хамідзі — 7 гадоў са свайго агульнага 13-гадовага тэрміну.
Акрамя таго, у якасці пакарання журналісткам таксама забаранілі ўдзельнічаць у палітычных партыях, групах або дзейнасці ў кіберпрасторы, сродках масавай інфармацыі і прэсе на два гады.
Відавочна, што жорсткія прысуды — гэта помста за асвятленне пратэстаў у Іране. Нілафар Хамідзі адной з першых апублікавала фатаграфіі 22-гадовай Джыны Махса Аміні ў лякарні. А Элаха Махамадзі падрыхтавала справаздачу аб смерці дзяўчыны.
Нагадаем, Джыну Махса Аміні арыштавала рэлігійная паліцыя за парушэнне ісламскага дрэс-кода ў верасні 2022 года. Улады па-ранейшаму сцвярджаюць, што памерла яна не ад пабояў, а ад раней невядомага захворвання. Пасля гэтага выпадку краіну скалыхнулі масавыя пратэсты. Яны працягваліся некалькі месяцаў.
Чытайце яшчэ:
У Іране пагражае смяротны прысуд любому, хто звяжацца з замежнымі СМІ
БАЖ падпісаўся за вызваленне іранскай карыкатурысткі
Першая цэль для ўзурпатараў. Тлумачым, для чаго грамадству незалежныя СМІ і чаму іх так не любяць аўтарытарныя рэжымы
@bajmedia
