Ірыне Слаўнікавай прызначылі 5 гадоў зняволення

Працэс з двума працяглымі перапынкамі доўжыўся амаль паўтара месяца. Справу ў закрытым рэжыме разгледзеў суддзя Мікалай Доля. Дзяржаўным абвінаваўцам выступала прадстаўніца пракуратуры Ірына Падкавырава. Абараняў Ірыну адвакат Уладзімір Пыльчанка, але ніякай інфармацыі па справе ён не дае з прычыны ўзятай з яго падпіскі пра неразгалошванне.

На абвяшчэнні прысуду прысутнічалі бацька і маці журналісткі. Бацьку, Аляксандру Слаўнікаву, сёлета двойчы ўдалося пабачыць дачку. У красавіку, калі завяршылася следства, яшчэ да пераводу Ірыны ў гомельскае СІЗА‑3, ён меў спатканне з дачкой у Мінску на Валадарцы. Другі раз гэта адбылося ў зале Гомельскага абласнога суда, куды бацьку выклікалі як сведку па справе дачкі.

Паводле слоў Аляксандра Уладзіміравіча, Ірына трымалася годна, разумеючы сваю правату і невінаватасць. Абвінавачанняў не прызнавала.

Ірыну Слаўнікаву разам з мужам Аляксандрам Лойкам затрымалі ў кастрычніку 2021 года ў Нацыянальным аэрапорце, калі яны вярталіся з адпачынку ў Егіпце. Сужэнцаў адправілі за краты пад адміністрацыйны арышт нібыта за “распаўсюд экстрэмісцкіх матэрыялаў”, а потым і за “дробнае хуліганства”.

Аляксандра Лойку праз 45 сутак адпусцілі, а Ірына пасля месячнага адміністрацыйнага арышту на волю так і не выйшла — яе зрабілі падазраванай у крымінальнай справе па “арганізацыі і падрыхтоўцы дзеянняў, якія груба парушаюць грамадскі парадак”. А потым дадалі яшчэ і новае абвінавачанне — “стварэнне экстрэмісцкага фармавання, альбо кіраўніцтва такім фармаваннем ці ўваходзячым у яго структурным падраздзяленнем”. 

Следчы камітэт сцвярджаў, што падчас расследавання крымінальнай справы нібыта атрыманыя доказы, што менавіта Слаўнікава была кіраўніцай “Белсата”, прызнанага ў Беларусі “экстрэмісцкім фармаваннем”. 

У адным з лістоў Ірына напісала, што ў судзе падчас спрэчак паміж бакамі вельмі добра выступіў яе абаронца Пыльчанка. І дадала: “Цягам чатырох гадзін ён аргументавана абвяргаў усе сфабрыкаваныя абвінавачванні”.

***

Ірына Слаўнікава нарадзілася ў Гомелі ў сям’і вайскоўца. Па адукацыі яна  эканаміст. Працавала па спецыяльнасці ў камерцыйных фірмах, пасля бухгалтарам у газеце “Беларуская маладзёжная”, дзе і захапілася журналістыкай.

Калі на пачатку 2000‑х бацькі паехалі ў Германію, з імі выправілася туды і Ірына. Займела яна ў Нюрнбергу нават від на жыхарства. Але вытрымала ў чужой краіне толькі год – вярнулася назад у Беларусь.

У 2007 годзе быў створаны беларускамоўны тэлеканал “Белсат”, які трансляваў перадачы з Польшчы, але так і не быў зарэгістраваны ў Беларусі пасля паўдзясятка адпаведных зваротаў да ўладаў. Слаўнікава супрацоўнічала з тэлеканалам, брала чынны ўдзел ў праваабарончай праграме “Маю права”. Яна ўступіла ў шэрагі ГА “Беларуская асацыяцыя журналістаў” і на з’ездзе сябраў грамадскага аб’яднання ў красавіку 2021 года была абраная адным з намеснікаў старшыні.

На момант затрымання Ірына Слаўнікава ўжо працяглы час не супрацоўнічала з “Белсатам”, а з’яўлялася штатнай супрацоўніцай польскага тэлеканала TVP.

Беларуская праваабарончая суполнасць прызнала журналістку Ірыну Слаўнікаву палітычным вязнем.

Чытайце яшчэ:

Суд у Гомелі: няволя за фотаздымак расійскай вайсковай тэхнікі ў цэнтры горада

Палітзняволены журналіст Дзяніс Івашын перанёс інфекцыю ў СІЗА

“Назваў напад СССР на Польшчу 17 верасня 1939 года савецкай агрэсіяй”: у чым абвінавачваюць Анджэя Пачобута