• Актуальнае
  • Медыяправа
  • Карыснае
  • Накірункі працы і кампаніі
  • Агляды і маніторынгі
  • Рэкамендацыі па бяспецы калег

    Фрылансэра Кастуся Жукоўскага аштрафавалі на 1150 рублёў

    Судзьдзя Сьветлагорскага раённага суду Руслан Царук прызнаў гомельскага журналіста-фрылансэра Кастуся Жукоўскага вінаватым у незаконным вырабе прадукцыі СМІ без акрэдытацыі для тэлеканалу «Белсат» і пакараў яго штрафам у памеры 50 базавых велічыняў, што складае 1150 рублёў.

    «Гэта мэтанакіраваны перасьлед за маю фрылансэрскую дзейнасьць, — лічыць Кастусь Жукоўскі. — Бо ў відэасюжэце „Белсату“ пра будаўніцтва кітайцамі заводу беленай цэлюлёзы ў Сьветлагорску выкарыстаныя ня толькі мае відэаздымкі, але і трох іншых агенцтваў. Тым ня менш судзілі толькі мяне аднаго».

    У міліцэйскім пратаколе, які склаў старшы ўчастковы інспэктар Крук, гаворыцца, што відэасюжэт «173 дні да пуску цэлюлёзнага камбінату ў Сьветлагорску. Жыхары супраць» на польскім спадарожнікавым тэлеканале «Белсат» пра будаўніцтва новага хімічнага прадпрыемства ў Сьветлагорску выяўлены падчас маніторынгу СМІ. Супольнае беларуска-кітайскае прадпрыемства па вытворчасьці сульфатна-беленай цэлюлёзы адносіцца да першай клясы небясьпекі: у працэсе адбельваньня цэлюлёзы хлёрам утвараюцца атрутныя хімічныя злучэньні. Гэта выклікае занепакоенасьць і трывогу мясцовых жыхароў і эколягаў.

    На фрылансэра Жукоўскага за відэасюжэты сёлета склалі звыш дзясятка пратаколаў — па артыкуле аб «незаконным вырабе і распаўсюджваньні прадукцыі сродкаў масавай інфармацыі». Ён адзін з 45 незалежных беларускіх журналістаў, якія трапілі пад перасьлед міліцыі за прафэсійную дзейнасьць.

    Толькі з пачатку 2017 году за працу без акрэдытацыі было аштрафавана 24 беларускія журналісты на агульную суму 17 618 рублёў.

    У сакавіку-красавіку Беларуская асацыяцыя журналістаў зафіксавала 96 выпадкаў затрыманьня штатных і няштатных супрацоўнікаў мэдыяў, зь іх шасьцёра пацярпелі ад фізычнага гвалту з боку міліцыі.

    Самыя важныя навіны і матэрыялы ў нашым Тэлеграм-канале — падпісвайцеся!
    @bajmedia
    Найбольш чытанае
    Кожны чацвер мы дасылаем на электронную пошту магчымасці (гранты, вакансіі, конкурсы, стыпендыі), анонсы мерапрыемстваў (лекцыі, дыскусіі, прэзентацыі), а таксама самыя важныя навіны і тэндэнцыі ў свеце медыя.
    Падпісваючыся на рассылку, вы згаджаецеся з Палітыкай канфідэнцыйнасці