Гомельскую журналістку Шчыракову прыцягваюць да адказнасці за стрым у Facebook

Мясцовыя жыхары  пратэстуюць, не маючы моцы мірыцца са смуродам, які накрыў наваколле пасля запуску пабудаванага кітайцамі ўшчыльную да вёскі завода сульфатнай беленай цэлюлозы. Завод гэты паўстаў на базе Светлагорскага цэлюлозна-кардоннага камбіната (ЦКК), ён узгоднены з беларускімі экалагічнымі і прыродаахоўчымі службамі.

Людзі адкрыта называюць вёску “далінай смерці”, скардзяцца на галавакружэнне, ваніты, абвастрэнне хранічных захворванняў і нават крывацёк з носа. Кіраўніцтва ЦКК запэўнівае грамадскасць, што смурод не ўплывае на стан здароўя, а выкіды розных газаў з заводу беленай цэлюлозы не перавышаюць дапушчальных узроўняў.

На стыхійным сходзе сабрана звыш паўтары сотні подпісаў супраць нездаровай экалагічнай сітуацыі — калектыўныя лісты накіраваны ў Міністэрства аховы здароўя, Мінпрыроды, Адміністрацыю прэзідэнта.

“Не паспеў прайсці адзін суд, як участковы міліцыянт Светлагорскага РАУС папярэдзіў мяне пра яшчэ адну адміністрацыйную справу — за 10 студзеня, калі ў Якімавай Слабадзе ладзілася сустрэча вясковых жыхароў з прадстаўнікамі мясцовай улады, спэцыялістамі ЦКК і экалагічных службаў Светлагорска. Я таксама вяла стрым з гэтай сустрэчы ў Face­book  і тут жа атрымала папярэджанне пра адказнасць. Такая вось у міліцыі апэратыўнасць, — кажа Ларыса Шчыракова.

Пакуль невядома, паводле якога артыкула прыцягваюць журналістку да адказнасці за стрым у сацыяльнай сетцы Face­book.

У мінулым годзе Шчыракову на падставе пратаколаў міліцыі раённыя суды Гомельскай вобласці шэсць разоў каралі адміністрацыйнымі штрафамі за падрыхтоўку прадукцыі СМІ без акрэдытацыі для польскага спадарожнікавага  тэлеканала “Белсат” — паводле артыкула 22.9 КаАП. Агульная сума штрафаў склала 4 715 рублёў.