Гродна: Ян Хведчын атрымаў узнагароду ва Украіне за выдатнае ФОТА

Здымак фатографа меў назву “Праліўная радасць”, ён паказвае момант традыцыйнага свята, што ладзіцца на Гродзеншчыне каля Аўгустоўскага канала.

“Удзельнічаў у гэтым конкурсе трэці год запар, заняў 3‑е месца з 6‑ці, — распавядае Ян Хведчын. — Пра сам конкурс даведаўся ад калег фатографаў. Фотаконкурс міжнародны, дасылаюць туды працы з усяго свету, у тым ліку і з Беларусі, і ў гэтым конкурсе вельмі высокія патрабаванні да прац. Ён праводзіцца шмат гадоў і з’яўляецца адным з галоўных конкурсаў прэс-фота Украіны”.

Ян Хведчын зазначае, што з гадамі ў яго паляпшаецца якасць здымкаў, і хочацца зрабіць унікальнае фота, не падобнае на здымкі калег-фатографаў. За апошні месяц фатограф адправіў некалькі заявак на розныя конкуры. “Пасля атрымання ўзнагароды жаданне толькі ўзрасло, ды і колькасць прац, якія можна прадставіць на конкурсах, павялічылася”, — кажа фатограф.

Ян Хведчын супрацоўнічае з рознымі СМІ Гродзешчыны. Ён рабіў здымкі для “Гродзенскай праўды” і “Вечернего Гродно”, партала TUT.BY і іншых незалежных СМІ, ладзіў розныя прыватныя праекты.