Сатырычнае шоу «ХАЙ ТАК TV» у Беларусі абвесцілі «структурным падраздзяленнем экстрэмісцкага фармавання»

У абноўленым 30 красавіка 2025 года «Пераліку арганізацый, фармаванняў, індывідуальных прадпрымальнікаў, датычных да экстрэмісцкай дзейнасці» на сайце МУС Беларусі сатырычнае тэлешоу «ХАЙ ТАК TV» названае «структурным падраздзяленнем экстрэмісцкага фармавання «БЕЛСАТ tvBEL­SAT».

Рашэнне прызнаць тэлеперадачу «ХАЙ ТАК TV» датычнай да «экстрэмісцкага фармавання» Міністэрства унутраных спраў Беларусі прыняло 25 красавіка 2025 года. Паводле сілавога ведамства, экстрэмісцкую дзейнасць ажыццяўляе «група грамадзян з ліку стваральнікаў, кіраўнікоў і ўдзельнікаў структурнага падраздзялення экстрэмісцкага фармавання «БЕЛСАТ tvBEL­SAT» пад назвай «ХАЙ ТАК TV».

Канкрэтных прозвішчаў на сайце МУС няма. Але пералічаныя інтэрнэт-рэсурсы, праз якія нібыта здзяйсняецца дзейнасць удзельнікаў фармавання. Гэта:

• Telegram-канал «Хай Так TV» (ідэнтыфіктар t.me/hajtaktv);
• Insta­gram-акаўнт з назвай «haj­tak­tv» (ідэнтыфіктар instragram.com/hajtaktv);
• Face­book-акаўнт з назвай «Хай так TV» (ідэнтыфікатар facebook.com/hajtaktv);
• Х‑акаўнт з назвай «Хай так TV» (ідэнтыфікатар twitter.com/hajtaktv);
• Tik­Tok-акаўнт з назвай «Хай Tак TV» (ідэнтыфікатар tiktok.com/@hajtaktv);
• Старонка ў «ВКонтакте» з назвай «Хай так TV» (ідэнтыфікатар https://vk.com/club154220491);
• Старонка ў «Одноклассниках» з назвай «ХАЙ ТАК TV» (ідэнтыфікатар ok.ru/hajtaktv);
• Старонка ў Lik­tree» з назвай «@bylol» (ідэнтыфікатар linktr.ee/bylol);
• YouTube-каналы з назвай «ByLOL» (ідэнтыфікатары youtube.com/channel/UCbxqT6VIv-2V7JrCbGX3eYA і youtube.com/@ByLOL_fun);
• Электронная пошта, а таксама лагатып — «у выглядзе надпісу «ХАЙ ТАК TV» на жоўта-сінім фоне».

У студзені 2024 года кантэнт гэтых рэсурсаў быў прызнаны «экстрэмісцкай інфармацыйнай прадукцыяй» і ўключаны ў Рэспубліканскі спіс экстрэмісцкіх матэрыялаў на сайце Мінінфармацыі Беларусі.

«Хай так TV» — гэта сатырычнае шоу пра беларускія рэаліі з пазнавальнымі персанажамі. Стваральнікі называюць яго «антыдотам супраць дзяржаўнай прапаганды».

Таксама ў абноўлены «Пералік арганізацый, фармаванняў, індывідуальных прадпрымальнікаў, датычных да экстрэмісцкай дзейнасці» паводле рашэння МУС Беларусі ад 25 красавіка 2025 года ўнесеная грамадская ініцыятыва «Партызанка». На сайце ведамства пералічаныя інтэрнэт-рэсурсы ініцыятывы, у тым ліку сайт з назвай Par­tyzan­ka (ідэнтыфікатар ko-fi.com/PARTYZANKA).

У пералік «экстрэмісцкіх фармаванняў» унесеная і «Партызанская хваля» — як «структурнае падраздзяленне экстрэмісцкага фармавання «Кибер-Партизаны» / «Кибер-сливы». Адпаведнае рашэнне МУС таксама прыняў 25 красавіка 2025 года. У якасці сродкаў «экстрэмісцкай дзейнасці» названыя інтэрнэт-рэсурсы, праз якія распаўсюджваліся эксклюзіўныя інфармацыйныя матэрыялы пра падзеі ў Беларусі, здабытыя «партызанскімі» метадамі. Гэта:

• Telegram-канал «ПарТЫзанскаЯ ХВАЛЯ» (ідэнтыфікатар t.me/PartizanWave);
• YouTube-канал «Партызанская хваля» (ідэнтыфікатар youtube.com/@PartizanWave) і іншыя інтэрнэт-рэсурсы ўключна з электроннай поштай.

Паводле рашэння КДБ Беларусі ад 21 красавіка 2025 года ў пералік «датычных да экстрэмісцкай дзейнасці» ўключаная віцебская ініцыятыва «Народны дэпутат». У складзе асоб, якія нібыта ажыццяўляюць экстрэмісцкую дзейнасць, згадваецца імя і прозвішча Аляксандра Корнышава — рэдактара інтэрнэт-выдання «Витебский Курьер news». Гэта ўжо другая згадка пра Аляксандра Корнышава ў «экстрэмісцкім» пераліку на сайце МУС: упершыню ён быў прызнаны ўдзельнікам «экстрэмісцкага фармавання» — кааліцыі «Европейский выбор» — у траўні 2024 года.