«Экстрэмісцкі спіс» Мінінфарма: Instagram Сяргея Чалага і сайт Беларускага фонда спартовай салідарнасці

У Рэспубліканскі спіс экстрэмісцкіх матэрыялаў 29 кастрычніка ў ліку іншых інтэрнэт-рэсурсаў унеслі Insta­gram-старонку эканамічнага аналітыка і публіцыста Сяргея Чалага і сайт Беларускага фонда спартовай салідарнасці.

Будынак Мінінфарма. Фота: president.gov.by

Рашэнне прызнаць  «экстрэмісцкімі інфармацыйнымі матэрыяламі» Insta­gram-акаўнт з назвай «chaly_news» (ідэнтыфікатар instagram.com/chaly_news/) прыняў 24 кастрычніка 2024 года суд горада Баранавічы і Баранавіцкага раёна.

Шэраг іншых акаўнтаў Сяргея Чалага ў сеціве былі ўнесеныя ў «экстрэмісцкі спіс» на сайце Міністэрства інфармацыі яшчэ раней. Так, 23 лютага там з’явіліся два акаўнты ў Tik­Tok «chaly_bic» і «chaly_live», старонкі ў Face­book «Чалый на БРЦ» і «Сергей Чалый», Telegram-канал «Сергей Вячеславович Чалый», старонка ў Insta­gram @chaly_bic, а таксама YouTube-канал «Чалый LIVE». Адпаведнае рашэнне пра гэта прыняў 19 лютага 2024 года суд Цэнтральнага раёна Мінска.

Сяргей Чалы — беларускі эканаміст. Супрацоўнічаў з шэрагам незалежных беларускіх СМІ ў якасці эканамічнага аглядальніка. Вядомы многім беларусам як аўтар і вядоўца праграмы «Экономика на пальцах», якая выходзіла з 2011-га да 2021 года на партале tut.by. А таксама як вядоўца вечаровага шоу «Ноч з Чалым», якое спыніла сваё існаванне сёлета ў верасні

У 2020 годзе Сяргей Чалы быў вымушаны выехаць з Беларусі з прычыны пераследу за прафесійную дзейнасць. У лістападзе 2023 года ў яго мінскай кватэры сілавікі правялі ператрус.

Таксама ў абноўлены сёння Рэспубліканскі спіс экстрэмісцкіх матэрыялаў уключаны сайт Беларускага фонда спартовай салідарнасці (Belaruss­ian sport sol­i­dar­i­ty foun­da­tion) з ідэнтыфікатарам bssf.eu. Рашэнне пра гэта 24 кастрычніка 2024 года прыняў суд Жлобінскага раёна Гомельскай вобласці.