Лунінецкія “бажаўцы” правялі традыцыйныя “Вераснёўскія сустрэчы” ў школах і бібліятэках

“Вераснёўскія сустрэчы” Лунінецкая філія БАЖ ладзіць шмат гадоў запар, — адзначае старшыня філіі Алена Юроўская. — Журналістаў чакаюць у школах, бібліятэках. Мы распавядаем пра сваю працу, пра асацыяцыю журналістаў, ладзім віктарыны і конкурсы, даем магчымасць раскрыцца дзіцячым літаратурным талентам.

7 верасня прайшло ажно тры сустрэчы ў Мікашэвічах з удзелам сябраў ГА «БАЖ»: Вадзіма Жылко, Мікалая Ільючыка і Галіны Самуйлік.

Спачатку госці завіталі ў СШ №1, распавялі пра гісторыю свята, літаратурныя традыцыі Лунінеччыны, найбольш актыўных вучняў адзначылі прызамі. Потым пабывалі ў Мікашэвіцкай дзіцячай і гарадской бібліятэках, дзе ўзнагародзілі прызёраў конкурсаў, што ладзіла газета “Информ-прогулка” летам. Падарункі атрымала і дзіцячая бібліятэка да свайго 65-гадовага юбілею.

Шэраг сустрэчаў БАЖаўцы арганізавалі днямі раней і ва ўстановах адукацыі і культуры Лунінца.