Любоў Лунёву і Змітра Краўчука аштрафавалі за супрацу з «Белсатам»
4 снежня 2017
Суд Савецкага раёну Менску прызнаў Любоў Лунёву і Змітра Краўчука вінаватымі па арт. 22.9 КаАП (парушэнне заканадаўства аб СМІ) і пакараў журналістаў штрафамі ў памеры 40 базавых велічынь (920 руб.) кожнаму.
«У судзе не было аніякіх доказаў. Не было ні скрыншотаў, ні відэаматэралаў – усе будавалася на паказаннях сведкаў-міліцыянтаў. Мы хутчэй за ўсё будзем абскарджваць прысуд у Менскім гарадскім судзе», – заявіў Краўчук у размове з belsat.eu.
Падставай для складання адміністратыўнага пратаколу стала праца журналістаў над сюжэтам пра суды над удзельнікамі акцыяў пратэсту ў Менску. Здымкі як раз адбываліся каля Савецкага суду. Аднак парадокс заключаецца ў тым, што сюжэт у эфір так і не выйшаў.
«То бок ніякага распаўсюду матэрыялаў СМІ не было», – падкрэслівае Краўчук.
Гэта ўжо другі суд для Краўчука і Лунёвай сёлета – 3 кастрычніка суд Завадскога раёну Менску пакараў абодвух журналістаў штрафамі ў памеры 690 рублёў за працу без акрэдытацыі.
Нагадаем, паводле артыкулу пра незаконны выраб прадукцыі медыяў і працы без акрэдытацыі толькі за гэты год журналісты «Белсату» заплацілі дзяржаве не менш за $ 14 000. Паводле «Рэпарцёраў без межаў», менавіта журналістаў нашага тэлеканалу беларускія ўлады пераследуюць часцей за ўсё.
@bajmedia
Паштоўкі для Марыны Золатавай. «Рэпарцёры без межаў» працягваюць кампанію ў падтрымку галоўрэда TUT.BY
24.10.2023
Бабруйскі журналіст Дзяніс Носаў выйшаў на волю пасля «сутак»
25.04.2024
Крымінальную справу супраць кіраўніка «Маланка Медыя» Паўла Марыніча перадалі ў суд
22.02.2024
Рэгіянальны сайт BrestNote прызналі «экстрэмісцкай інфармацыйнай прадукцыяй»
13.04.2024
