Настассю Мацяш, асуджаную за супрацу з «Белсатам», унеслі ў «спіс экстрэмістаў»

Звесткі пра Настассю Мацяш 19 ліпеня з’явіліся ў пераліку грамадзян, «датычных да экстрэмісцкай дзейнасці», які складае Міністэрства ўнутраных спраў Беларусі.

Настасся Мацяш. Фота: сацсеткі

На сайце МУС паведамляецца, што жанчына ўжо адбывае прысуджанае ёй пакаранне.
 
 19 красавіка 2024 года Мінскі гарадскі суд прызнаў Настассю Мацяш вінаватай ва «ўдзеле ў экстрэмісцкім фармаванні» паводле часткі 3 артыкула 361–1 Крымінальнага кодэкса. Суддзя Святлана Макарэвіч прызначыла ёй два гады пазбаўлення волі з адбыццём у папраўчай калоніі і штраф памерам 20 тысяч рублёў. Таксама суд абавязаў сплаціць дзяржаве 102 415 рублёў і 12 капеек — як «даход, атрыманы злачынным шляхам».
 
Бок абвінавачання даводзіў, што з чэрвеня 2021 года да лістапада 2023 года, Настасся Мацяш,

«з’яўляючыся моўным кансультантам Польскага тэлебачання TVP, у склад якога ўваходзіць польскі тэлеканал «Белсат tv Bel­sat», неаднаразова на загад кіраўніцтва «Белсат», прызнанага экстрэмісцкім фарміраваннем, ажыццяўляла правядзенне моўных кансультацый, пераклад, карэктаванне, рэдагаванне тэкстаў, якія ў далейшым выкарыстоўваліся ўдзельнікамі экстрэмісцкага фармавання «Белсат» для экстрэмісцкай дзейнасці, у тым ліку шляхам стварэння і распаўсюду з выкарыстаннем сродкаў масавай інфармацыі і сеткі інтэрнэт».

28 чэрвеня Вярхоўны суд разгледзеў апеляцыйную скаргу Настассі Мацяш. Суддзя Сяргей Гураў пакінуў скаргу без задавальнення, а вырак суда першай інстанцыі — без зменаў.

Інтэрнэт-рэсурсы тэлеканала «Белсат» былі абвешчаны «экстрэмісцкім фармаваннем» 3 лістапада 2021 года. Адпаведнае рашэнне прыняло Міністэрства ўнутраных спраў Беларусі.

Беларуская праваабарончая супольнасць прызнала Настассю Мацяш палітычнай зняволенай.