Полацкага відэаблогера аштрафавалі за імітацыю крадзяжу для здымак роліка

На дадзены момант гэты відэаролік выдалены з youtube-канала, які пад нікам Geibal вядзе 18-гадовы Раман Ляўкоўскі. На канале засталіся ролікі пра тое, як блогеру забаранялі здымаць у крамах — тады, як ён цвердзіць, калі ён меў на гэта права. А таксама пра міліцыянта, які курыць каля крамы. Блогер просіць яго выкінуць цыгарэту, бо супрацоўнікам міліцыі ў форме забаронена курыць у грамадскіх месцах. 

Блогер тлумачыць, што крадзеж ён імітаваў, каб праверыць пільнасць гандляроў. Паводле сюжэту Наваполацкага тэлеканала “Вектор ТВ”, такім чынам ён “дэзарганізаваў працу крамы”. Ляўкоўскага затрымала ахова крамы, бо ягоныя дзеянні зафіксавалі камеры ў гандлёвай зале.

Афіцыйная прадстаўніца Полацкага РАУС Юлія Зайцава паведаміла, што Раман Ляўкоўскі адвезлі ў міліцыю і пакінулі да суда ў ізалятары часовага ўтрымання. Суд пастанавіў аштрафаваць блогера паводле артыкула 17.1 КаАП РБ на пяць базавых велічынь (127,5 рубля).

Падзея атрымала розгалас у полацкіх пабліках: у  хлопца, з відаэролікаў якога спачатку многія кпілі, папракаючы за “недарэчныя здымкі”, з’явілася падтрымка. І не толькі віртуальная ў выглядзе росту колькасці падпісчыкаў, але і рэальная. У шэрагу груп сацыяльнай сеткі “Вконтакте” размешчана аб’ява пра збор сродкаў, каб дапамагчы хлопцу сплаціць штраф. Сярод каментароў сустракаецца нямала прыхільных водгукаў, маўляў, хлопец ажыццяўляе “народны кантроль”. Але дзейнасць 18-гадовага відэаблогера выклікала і шмат негатыўных меркаванняў пра тое, што ён замінае гандлярам і пакупнікам.