Праваабаронца Леанід Свецік: Сёлета ўзмацніўся ціск на журналістаў і блогераў

Праваабаронца, сябар ГА “БАЖ” Леанід Свецік вымушаны канстатаваць, што значная частка матэрыялаў “Шэрай кнігі” прысвечаная пераследу журналістаў і ціску на блогераў:

— Гэтая тэндэнцыя стала заўважнай некалькі гадоў таму, але ў апошні час пераслед з боку ўладаў з мэтай абмежаваць распаўсюд незалежнай інфармацыі яшчэ больш узмацніўся. Калі раней самай уразлівай групай былі грамадскія актывісты, то цяпер відавочна, што “вайна” абвешчана ўсім, хто нясе праўду ў самыя шырокія колы беларускага грамадства. Пад судовы пераслед трапілі прынамсі шэсць чалавек з Віцебшчыны — аштрафаваныя за супрацоўніцтва з тэлеканалам “Белсат”, некаторыя з іх па некалькі разоў.

Літаральна ў апошнія месяцы стала відавочна, што пад прэсінг трапілі найбольш актыўныя блогеры: Сяргей Сікора з Віцебска, Зміцер Казлоў з Оршы, Алесь Круткін з Полацка.

“Шэрая кніга-2019” ахоплівае перыяд ад верасня 2018-га да жніўня 2019-га гадоў. Зборнік выходзіць раз на год, і праваабаронцы  ўжо збіраюць матэрыялы для наступнага выпуску. Выданне не траціць сваёй актуальнасці з першага выпуску ў 2012‑м годзе, бо сітуацыя з правамі чалавека не паляпшаецца.

У тым ліку не спыняецца ціск на незалежных журналістаў: 12 снежня ў Віцебску будуць судзіць Алену Шабуню і Змітра Лупача, якіх вінавацяць паводле артыкула 22.9 КаАП за сюжэт тэлеканале “Белсат” пра адмову вяскоўцаў удзельнічаць у мінулых парламенцкіх выбарах.