“Рэпарцёры без межаў” заклікаюць вызваліць Эдуарда Пальчыса

Пра гэта гаворыцца ў заяве, змешчанай 28 ліпеня на сайце міжнароднай арганізацыі.

“Рэпарцёры” нагадваюць перадгісторыю справы:

Эдуард Пальчыс, які працаваў пад псеўданімам Джон Сільвер, правёў паўгады пад арыштам спачатку ў Расіі, а пасля ў Беларусі, пасля экстрадыцыі ў Мінск у чэрвені 2016-га.

Першапачаткова яго арыштавала беларускае КДБ у маі 2015. Пальчысу прызначылі судовую экспертызу, месяц ён быў пазбаўлены візітаў родных і доступу да гарачай вады.

Пасля вызвалення супраць Пальчыса завялі справу па наступных абвінавачаннях: “распальванне расавай варожасці” ў двух допісах у блогу (прадугледжанае пакаранне – ад штрафу да пяці гадоў зняволення) і за “распаўсюд парнаграфічнага кантэнту” ў калажы, які ілюстраваў яго іншы допіс (прадугледжанае пакаранне – ад 2 да 4 гадоў зняволення).

Асцерагаючыся адвольнага суда, Пальчыс пакінуў Беларусь у жніўні 2015 года і з’ехаў ва Украіну. Блогера арыштавалі ў студзені 2016-га падчас візіту ў Расію.

““Рэпарцёры” заклікаюць вызваліць Пальчыса, чыё прэвентыўнае ўтрыманне пад арыштам непрапарцыйна злачынствам, у якіх ён абвінавачваецца,” – заявіў Ёхан Бір, кіраўнік аддзела RSF па Усходняй Еўропе і Цэнтральнай Азіі.

“Допісы ў блогу і ілюстрацыі павінны быць даследаваныя незалежнай арганізацыяй, – напрыклад, ГА “Беларуская асацыяцыя журналістаў”. У той жа час, заканадаўства Беларусі датычна злачынстваў у сферы СМІ павінна быць перагледжана. Пакаранне, якое можа быць ужыта, – асабліва ў выглядзе пяці гадоў турмы – абсалютна непрапарцыйна”, – кажа Ёхан Бір.

Пакуль што нікому не давалі доступу да матэрыялаў з блога і ілюстрацый, па якіх прад’яўлена абвінавачанне, таму незалежнай ацэнкі не было, – нагадваюць “Рэпарцёры”.

Беларусь знаходзіцца на 57‑м месцы са 180 у Індэксе свабоды прэсы “Рэпарцёраў без межаў”.