За абразу журналіста ў Літве хочуць даваць штрафы да 300 еўра

Спікерка Сейма Літвы Вікторыя Чмілітэ-Нільсэн прапануе ўвесці штрафы за абразу журналістаў, паведамляе LRT.

Фота: J. Stace­viči­aus / LRT

Яна падрыхтавала папраўкі да Кодэкса аб адміністрацыйных правапарушэннях. Калі змены будуць прынятыя, яны дазволяць накладаць штраф у памеры ад 50 да 300 еўра за абразу журналіста пісьмовымі, вуснымі, жэстыкуляцыйнымі, абразлівымі, правакацыйнымі ці іншымі паводзінамі.

Паводле Чмілітэ-Нільсэн, прафесійныя арганізацыі, якія аб’ядноўваюць журналістаў, рэгулярна звяртаюць увагу на тое, што падчас законнага збору інфармацыі журналісты падвяргаюцца абразам, прыніжэнню іх гонару і годнасці.

«Асабліва часта гэта адбываецца ў перыяд складаных сацыяльна-эканамічных або палітычных падзей, калі журналісты, асвятляючы важныя падзеі ў грамадскіх месцах і збіраючы інфармацыю законнымі спосабамі, падвяргаюцца абразам, пагрозам і іншым супрацьпраўным дзеянням, якія перашкаджаюць іх прафесійнай дзейнасці», — гаворыцца ў тлумачальнай запісцы да праекту.

Зараз літоўскі Кодэкс аб адміністрацыйных правапарушэннях не прадугледжвае адказнасці за абразу журналістаў. Між тым паклёп у дачыненні да дзяржаўных палітыкаў, ваенных, прадстаўнікоў спеслужбаў і чыноўнікаў караецца.

На думку Чмілітэ-Нільсэн, абраза гонару і годнасці журналіста звычайна кваліфікуецца як нязначнае парушэнне грамадскага парадку.

Згодна з прапановай, расследаванне адміністрацыйных правапарушэнняў, звязаных з замахам на годнасць журналістаў, будзе ажыццяўляць інспектар па журналісцкай этыцы. Ён жа будзе складаць пратаколы аб адміністрацыйных правапарушэннях.