У Глыбокім прайшоў трэнінг на тэму “Інтэрв’ю. Гутарка з цяжкім суразмоўцам”
29 чэрвеня 2015
У якасці трэнера выступіў журналіст і сябра праўлення ГА “БАЖ” Аляксандр Коктыш.
З жанрам інтэрв’ю ў сваёй працы сустракаецца кожны журналіст, незалежна ад СМІ, у якім ён працуе. І хоць ёсць свае асаблівасці працы з інтэрв’ю на радыё і тэлебачанні, але плануецца яно амаль аднолькава. Над чым і працавалі БАЖАўцы ў Глыбокім. У першую чаргу гэта складанне дасье на героя гутаркі, падрыхтоўка пытанняў, расстаноўка акцэнтаў.
Але гэтага недастаткова ведаць, трэба разбірацца яшчэ і ў псіхалогіі, бо журналістам у наш час вельмі часта прыходзіцца працаваць са складанымі суразмоўцамі.
Такіх у журналістаў-практыкаў сустракаецца нямала, іх падзяляюць на тры асноўныя групы — маўчуны, гаварліўцы і агрэсары. На трэнінгу ўдзельнікі разбіраліся з тым, як знайсці падыход да кожнага.
Аляксандр Коктыш дзяліўся з прысутнымі сваім вопытам падрыхтоўкі да інтэрв’ю. Напрыканцы трэнінгу прысутныя выконвалі практычныя заданні па групах, складалі план інтэрв’ю. Потым праводзіўся аналіз працы і вялася работа над памылкамі.
У час мерапрыемства журналісты змаглі крыху і адпачыць, паслухаўшы выдатныя вершы паэткі і барда Марыі Новікавай з Глыбоччыны.
Першы зборнік яе лірычных вершаў «Паверу ў цуды» прэзентавала маці творцы, паэтка Марыя Баравік.
@bajmedia
