Брэсцкім уладам прапануюць праз мясцовыя СМІ рабіць справаздачу пра выкарыстанне “транспартнага падатку”

У звароце, збор подпісаў пад якім быў арганізаваны ў межах кампаніі “За наш горад”, гаворыцца, што шмат хто з жыхароў Брэста сплаціў дзяржаўную пошліну за выдачу дазволу на допуск транспартнага сродку да ўдзелу ў дарожным руху (так званы “транспартны падатак”). Мэтай новаўвядзення было абвешчана фінансаванне будаўніцтва новых і рамонту існуючых дарог: 50 % сумы ад дзяржпошліны паступаюць у рэспубліканскі бюджэт, 50 % — у мясцовыя бюджэты.

Як нагадваюць ініцыятары звароту, у адпаведнасці з Канстытуцыяй і Законам РБ “Аб інфармацыі, інфарматызацыі і абароне інфармацыі”, грамадзянам Рэспублікі Беларусь гарантуецца права на атрыманне, захоўванне i распаўсюджванне поўнай, дакладнай i своечасовай iнфармацыi аб дзейнасцi дзяржаўных органаў. Таму актывіствы кампаніі “За наш горад” заклікаюць мясцовыя ўлады публічна — праз сайт Брэсцкага гарвыканкама і рэгіянальныя СМІ — паведаміць, колькі грошай паступіла ад “транспартнага падатку” ў 2014 – 2016 гадах у бюджэт горада, і агульную суму сродкаў, выдаткаваных за гэтыя гады на рамонт дарог у Брэсце.

Акрамя таго, аўтары звароту просяць, каб у далейшым інфармацыя пра паступленне і мэтавае выкарыстанне сродкаў “транспартнага падатку” таксама рэгулярна (адзін раз у квартал) з’яўлялася на старонках мясцовых выданняў і на сайце гарвыканкама.

Аналагічны збор подпісаў за публічнасць у выдаткоўванні сродкаў на рамонт дарог актывісты кампаніі “За наш горад” ладзяць цяпер у Бярозаўскім, Лунінецкім, Драгічынскім раёнах Брэсцкай вобласці і горадзе Пінску. Агулам у брэсцкім рэгіёне сабрана амаль адна тысяча подпісаў.