YouTube выдаліў каналы беларускіх дзяржаўных медыяў — у адказ яны пагражаюць прызнаннем пляцоўкі «экстрэмісцкай»

Увечары 3 красавіка беларускія дзяржаўныя СМІ паведамілі, што відэахостынг YouTube выдаліў іх каналы, а менавіта — БелТА, СТБ і АНТ.

Да прыкладу, замест праграмы Рамана Пратасевіча, у якой ён яшчэ 2 красавіка пагражаў расправай незалежным беларускім журналістам, паўстала шэрая плашка з клічнікам і надпісам «відэа недаступна». Гэтай праграмы больш няма на YouTube, як і шматлікіх іншых.

Тэлеканал АНТ растлумачыў, што блакаванне — «гэта не проста абмежаванне доступу, а поўнае фізічнае выдаленне з сервераў вялізных архіваў навінавых выпускаў, аналітычных праграмаў і дакументальных цыклаў, якія назапашваліся гадамі».

Праўладныя СМІ ў сваіх допісах прыгразілі відэаплатформе «экстрэмісцкім» статусам.

«Выглядае, што YouTube зрабіў апошнія крокі да прызнання экстрэмісцкай пляцоўкай і поўнага блакавання ў Беларусі», — такі допіс выпусціў Першы інфармацыйны канал.

Пракаментаваў блакаванне і Мінінфарм: «Міністэрства інфармацыі Рэспублікі Беларусь негатыўна ацэньвае гэты несяброўскі і беспадстаўны крок і пакідае за сабой права на прыняцце неабходных мер рэагавання».

БелТА напісала, што каналы былі выдаленыя праз санкцыі, аднак зазначыла, што само агенцтва не знаходзіцца ў нейкім санкцыйным спісе.

Пра выдаленне праз санкцыі напісаў таксама канал СТВ і таксама абурыўся, падкрэсліўшы, ЗАТ «Сталічнае тэлебачанне» і кіраўніцтва кампаніі не знаходзіцца пад нейкімі санкцыйнымі абмежаваннямі.

Старшыня кіраўніцтва праўладнага Беларускага саюзу журналістаў Андрэй Крывашэеў паабяцаў, што арганізацыя будзе скардзіцца ва ўсе міжнародныя інстанцыі.