Заява БАЖ: Спыніць «паляванне на ведзьмаў» і ўжыванне «экстрэмісцкага» заканадаўства для падаўлення іншадумства

Толькі на мінулым тыдні былі кінутыя за краты медыяспецыялісты яшчэ двух рэгіянальных выданняў. Па падліках БАЖ, сёння за кратамі не меней за 45 нашых калег.

Заява Беларускай асацыяцыі журналістаў

Сітуацыя са свабодай выказвання меркавання і незалежнымі СМІ ў Беларусі застаецца адной з горшых у свеце. У «Індэксе свабоды прэсы 2024» Беларусь займае 167‑е месца са 180. У параўнанні з папярэднім «Індэксам» Беларусь апусцілася яшчэ на 10 пазіцый.

Згодна з нядаўнім даследваннем «Рэпарцэраў без межаў» Беларусь знаходзіцца на чацвёртым месцы ў свеце па колькасці журналістаў за кратамі. 

Толькі на мінулым тыдні былі кінутыя за краты медыяспецыялісты яшчэ двух рэгіянальных выданняў. Па падліках БАЖ, сёння за кратамі не меней за 45 нашых калег.

Для перашкоды дзейнасці незалежных медыяў улады актыўна ўжываюць заканадаўства аб супрацьдзеянні экстрэмізму. Большасць незалежных СМІ і медыяарганізацый, у тым ліку БАЖ, прызнаны экстрэмісцкімі фарміраваннямі.

У дадатак да палітычнага ціску беларускія незалежныя медыі сутыкаюцца з эканамічнымі цяжкасцямі, хапае праблемаў і ў замежных медыяў, якія працуюць на беларускую аўдыторыю.

Нягледзячы на ​​масавыя блакіроўкі сайтаў, «экстрэмісцкі» статус і рэлакацыю, абсалютная большасць незалежных беларускіх СМІ працягвае сваю працу на высокім прафесійным і тэхналагічным узроўнях. Яны забяспечваюць грамадзян Беларусі незалежнай, аб’ектыўнай і рознабаковай інфармацыяй і супрацьстаяць дзяржаўнай прапагандзе і дэзінфармацыі з боку Расіі.

Беларуская асацыяцыя журналістаў заклікае:

журналістаў і медыясупольнасць

• трымацца праўды, трымацца разам;
• працягваць сваю дзейнасць дзеля выканання сваёй місіі: дапамагаць грамадзянам рабіць усвядомлены выбар на аснове поўнай і праўдзівай інфармацыі;
• прытрымлівацца прафесійных стандартаў і правілаў журналісцкай этыкі; аднавіць сістэму самарэгулявання беларускіх медыяў.

беларускае грамадства

• адрозніваць інфармацыю і меркаванні ад прапаганды;
• чытаць, слухаць, глядзець незалежныя медыі (з улікам патрабаванняў уласнай бяспекі);
• берагчы сябе.

беларускія ўлады

• спыніць «паляванне на ведзьмаў» і ўжыванне «экстрэмісцкага» заканадаўства для падаўлення іншадумства;
• вызваліць журналістаў-палітвязняў і усіх палітзняволеных;
• аднавіць беларускасць у беларускай дзяржаве, не даць яе паглынуць пад выглядам інтэграцыйных працэсаў.

міжнародныя арганізацыі і структуры, а таксама ўрады замежных краін

• не забываць у гэтым шалёным свеце пра Беларусь;
• патрабаваць ад беларускіх уладаў выканання міжнародных абавязкаў у галіне правоў чалавека і ў тым ліку свабоды выказвання;
• працягваць падтрымку незалежных беларускіх медыяў і грамадскай супольнасці.

Рада БАЖ, снежань, 2024 года.