• Актуальнае
  • Медыяправа
  • Карыснае
  • Накірункі працы і кампаніі
  • Агляды і маніторынгі
  • Рэкамендацыі па бяспецы калег

    БелаПАН стаў генэральным партнэрам #БНР100

    У «Сьвята Незалежнасьці» 25 сакавіка зьявіўся першы генэральны партнэр. Ім стала беларускае незалежнае інфамагенцтва БелаПАН, паведамляецца на сайце кампаніі па сьвяткаваньні 100 год БНР.

    Мітынг каля тэатру опэры і балету, архіўнае фота

    Сума фінансавай падтрымкі не агучваецца. Паводле інфармацыі на старонцы краўдфандынгу #БНР100, ахвяраваньне сумы 10 000 рублёў і больш дае статус генэральнага спонсара.​

    Як паведаміў Радыё Свабода кіраўнік БелаПАН Алесь Ліпай, інфармацыйнае агенцтва падтрымала сьвяткаваньне стагодзьдзя БНР, каб ушанаваць памяць тых, хто змагаўся за незалежнасьць Беларусі.

    «Абвяшчэньне БНР — гэта ж адна з найважнейшых датаў у беларускай гісторыі, адзін з наймацнейшых камянёў у падмурку незалежнасьці нашай краіны. Далучыць да гэтага сьвяткаваньня як мага больш людзей, пераўтварыць Дзень Волі ў агульнанацыянальнае сьвята — гэта ня проста даніна памяці ўсім тым, хто змагаўся за нашую свабоду, але і гарантыя нашага сувэрэнітэту на будучыню. Для інфармацыйнай кампаніі БелаПАН, якая зьяўляецца равесьніцай Рэспублікі Беларусь, незалежнасьць нашай краіны заўсёды будзе найбольшай каштоўнасьцю дзеля якой варта жыць і працаваць», — патлумачыў Алесь Ліпай.

    Арганізацыю сьвяточных мерапрыемстваў да стагодзьдзя БНР падтрымалі таксама кампаніі «Цесьляры» і Svaje.by, гульнявая прастора «Quval­da» і сувэнірная крама «Мой модны кут». Памер спонсарскіх ахвяраваньняў склаў ад 1000 да 5000 рублёў.

    Найбольш на сьвяткаваньне 100 год БНР ахвяравалі айцішнікі

    Сярод прыватных ахвяраваньняў найбольш вылучыліся IT-прадпрымальнікі, паведаміў Свабодзе адзін з арганізатараў краўдфандынгу блогер Эдуард Пальчыс. Менчук Уладзіслаў Чачоткін ахвяраваў на сьвяткаваньне 100 год БНР 2500 рублёў. Свой удзел у краўдфандынгу айцішнік патлумачыў прыналежнасьцю да Беларусі і жаданьнем удзельнічаць у жыцьці грамадзтва. Прыклад Чачоткіна натхніў іншага айцішніка Барыса Яўсеенку. Ён ахвяраваў 2555 рублёў, на дадзены момант гэта найбольшая прыватна сума ўдзелу ў краўдфандынгу.

    Айцішнік Міхась Бутылін падтрымаў выраб памятнай дошкі, якую ўсталююць на будынку Валадарскага 9, дзе была абвешчана незалежнасьць БНР. Унёсак Бутыліна — 1000 рублёў, гэта найбольшая сума, якую ахвяравалі на дошку да 100-годзьдзя БНР.

    2 сакавіка гарадзкія ўлады далі дазвол на канцэрт і мітынг каля Опэрнага тэатру 25 сакавіка. На канцэрт і мітынг вядзецца народны збор грошай: на Talaka.by ужо сабралі больш за 80% неабходнай сумы, таксама сродкі зьбіраюць іншымі шляхамі. Арганізатары шукаюць спонсараў сярод камэрцыйных кампаній.

    Самыя важныя навіны і матэрыялы ў нашым Тэлеграм-канале — падпісвайцеся!
    @bajmedia
    Найбольш чытанае
    Кожны чацвер мы дасылаем на электронную пошту магчымасці (гранты, вакансіі, конкурсы, стыпендыі), анонсы мерапрыемстваў (лекцыі, дыскусіі, прэзентацыі), а таксама самыя важныя навіны і тэндэнцыі ў свеце медыя.
    Падпісваючыся на рассылку, вы згаджаецеся з Палітыкай канфідэнцыйнасці