Дзяржаўная беларускамоўная газета «Культура» пачала дубляваць навіны ў тэлеграме па-руску
Тэлеграм дзяржаўнай беларускамоўнай газеты «Культура» з нядаўняга часу стаў двухмоўным. Цяпер пасты ў ім дублююцца на рускую, чаго раней ніколі не назіралася. Гэты змены ў палітыцы выдання звязваюць з прыходам на пасаду дырэктара ўстановы «Культура і мастацтва» новага кіраўніка – Наталлі Кузняцовай.
Наталля Кузняцова – у мінулым выконвала абавязкі начальніка аддзела ідэалагічнай работы, культуры і па справах моладзі Барысаўскага райвыканкама. Яна замяніла на пасадзе менеджара Віктара Дулевіча, які, у сваю чаргу, быў прызначаны дырэктарам рэдакцыйна-выдавецкай установы толькі ў 2020 годзе.
Дулевіч за час свайго кіравання запомніўся істотным «скарчэннем» штату часопіса «Мастацтва» – супрацоўнікам не працягнулі кантракты; «дасталося» і «Культуры». Але ў нядаўнім інтэрв’ю газеце «ЛіМ» экс-дырэктар установы падымаў пытанне пра ўзбуйненне выдання – у прыватнасці, павелічэнне колькасці палос у газеце «Культура» з 16 да 28. Менеджар дзяліўся планамі, аднак ужо ў наступным месяцы ему не працягнулі кантракт.
З чым звязаныя змены? Адказ можна знайсці ў своеасаблівым наказе новаму кіраўніку ад міністра культуры Анатоля Маркевіча, які той агучыў падчас знаёмства Наталлі Кузняцовай з калектывам РВУ «Культура і мастацтва».
«Галоўная задача дырэктара і калектыву — «не толькі ў аб’ектыўным і прафесійным асвятленні працэсаў у культурнай сферы краіны, папулярызацыі творчых дасягненняў нашых выдатных дзеячаў культуры і мастацтва, але і ў сістэмнай рабоце па фарміраванні грамадскай думкі аб ролі дзяржавы ў захаванні нашай гісторыка-культурнай спадчыны і падтрымцы сферы культуры, у фарміраванні светапогляду падрастаючага пакалення», – сказаў Маркевіч.
Гэта «рэкамендацыя» па «фарміраванні грамадскай думкі аб ролі дзяржавы ў падтрымцы культуры» на дадзены момант спрацавала нечакана. У выдання пачаў змяняцца моўны курс. Пакуль у тэлеграме, але, магчыма, гэта першы «звоночек»?
Чытайце яшчэ:
«У калоніі дапамагаў іншым зняволеным, але непублічна, таемна». Інтэрв’ю Леаніда Судаленкі для БАЖ
Праваабаронцы прызналі блогера Аляксандра Ігнацюка палітвязнем
Міністэрства інфармацыі разблакавала рэгіянальны сайт BrestNote
![](https://baj.media/wp-content/themes/baj/assets/images/telegram-logo.jpg)