Прасоўванне кантэнту ў сацыяльных сетках. Што важна рабіць рэдакцыям СМІ

“Стварэнне арыгінальнага кантэнту журналістамі робіцца менш важным, а больш істотным становіцца агрэгацыя праз сацыяльныя сеткі, бо тут знаходзіцца аўдыторыя”, — расказвае эксперт сусветныя тэндэнцыі.

Baj.by занатаваў карысныя парады з майстар-класа Паўлюка Быкоўскага пад час Hrod­na Media Week­end.

Як ствараць кантэнт для сацыяльных сетак

Колькасць радкоў допіса для карыстальніка адлюстроўваецца ў залежнасці ад прыстасавання: кампутар, планшэт ці смартфон. У любым разе рэкамендуецца, каб колькасць радкоў паста была не большай за 10: далёка не ўсе наведвальнікі захочуць клікаць гузікі “яшчэ” і “чытаць далей”.

Альбо можна наадварот рабіць інтрыгу і абрываць тэкст допіса ў самым цікавым месцы. У прыклад Паўлюк Быкоўскі прывёў публікацыі ў Face­book журналіста “Еўрарадыё” Алеся Пілецкага. У яго большасць пастоў зроблены такім чынам. Рэдакцыям варта правяраць выгляд допісу перад публікацыяй з розных гаджэтаў.

Разумная стратэгія — укладаць думку ў не больш як 140 сімвалаў. Балазе, Twit­ter паказвае, што гэта магчыма. Паводле спецыяльнага даследвання, болей зваротнай сувязі атрымліваюць пасты да 70 знакаў.

Тэкст на малюнку часта дублюецца з загалоўкам артыкула па спасылцы. Гэтага варта пазбягяць.

Малюнкі: адзін шырокі выглядае добра, галерэя з 2–4 здымкаў — не вельмі, больш за 5 — атрымаецца калаж, які будзе выглядаць занадта страката.

Памер фота неабходна задаваць самім, інакш робат можна сціснуць ці расцягнуць выяву аўтаматычна. Рэкамендаваныя памеры фота для кожнай сацсеткі можна паглядзець у адпаведных даведкавых цэнтрах і інфармацыі службы падтрымкі.

Відэа запампаванае наўпрост ў “Вконтакте” і Face­book працуе лепей за відэа, запампаванае на YouTube, а фота прыносіць больш заангажаванасці, загружанае праз Insta­gram. 

Тры тыпы хэштэгаў: падзеі, тэмы і флэшмобы. Яны працуюць не ва ўсіх сацыяльных сетках аднолькава. Лепш за ўсё ў Twit­ter, для якіх іх і прыдумалі. У Face­book хэштэгі  дазваляюць пабачыць усе публікацыі на дадзеную тэму.

Коцікі працуюць заўсёды! — нагадвае Паўлюк Быкоўскі.

Уікенд-пост і ланч-тайм. Словы кажуць самі за сябе. На выходныя адмыслоўцы рэкамендуюць планаваць больш лёгкія публікацыі, каб не губляць актыўнасць аўдыторыі ў вашым пабліку. Ланч-тайм неабходны, каб менавіта ў вашым акаўнце знаходзіліся карыстальнікі, пакуль чакаюць у чарзе ў сталоўцы, разагравае мікрахвалёўка альбо афіцыянтка прынясе замову. Для некаторых людзей перапынак на абед — адзіная магчымасць сярод дня пачытаць навіны.

Самы розны інтэрактыў з падпісчыкамі: конкурсы, гульні, розыгрышы. Рэдакцыі некаторых выданняў глядзяць на такую забаўляльную форму камунікацыі з аўдыторыяй скептычна. І разам з тым варта лічыцца з высокімі паказчыкамі ангажаванасці, якія дае такое ўзаемадзеянне з публікай. Для SMM-спецыялістаў у рэдакцыях гэта можна азначаць, што варта прыдумваць гэтыя “фішкі” у адпаведнасці з канцэпцыяй дадзенага СМІ, зацікаўленасцямі чытачоў.

Як выглядае SMM у рэдакцыях рэгіянальных медый сёння?

Святлана Цішко, галоўны рэдактар kraj.by:

Я не магу сказаць, што задаволена нашай працай у сацыяльных сетках. У нас ёсць некалькі чалавек, якія павінны забяспечваць нашую прысутнасць у сацсетках: у Face­book, «Вконтакте» і «Одноклассниках». Гэта дадатковая нагрузка і адпаведна дадатковая аплата. У Twit­ter у нас наладжана аўтаматычная пераадрасацыя.

9–10 % нашага трафіка — гэта сацыяльныя сеткі.

Чалавек, адказны за канкрэтны паблік, сам вырашае, што і калі публікаваць. За статыстыкай мы сочым разам.

Пры ўсёй свабодзе адказныя за нашы акаўнты памятаюць, што і ў сацсетках мы застаемся СМІ, то бок мы талерантныя, сочым за якасцю жартаў, не пераходзім межы прыстойнасці, на заўвагі падпісчыкаў адказваем стрымана, нават калі яны агрэсіўныя.

Канешне, мне хацелася б аднаго SMM-шчыка, з якога можна спытаць за усё, але пакуль наш бюджэт не можа сабе такога дазволіць.

Аляксей Шота, рэдактар сайта Hrodna.life:

Было б аптымальна, каб быў спецыяльны чалавек па працы ў сацыяльных сетках. Зараз займаюся гэтым я і яшчэ адзін аўтар. Гэта, канешне, мінус.

Ёсць аўтары, якія посцяць усё сваё ў сацыяльныя сеткі. Іншыя распаўсюджваюць толькі свае артыкулы. У нас няма патрабаванняў адносна гэтага.

Адзін з нашых аўтараў мае некалькі папулярных груп “ВК” і проста так, толькі таму што ён наш аўтар, распаўсюджвае матэрыялы з нашага сайта. Гэтыя групы — 4–8 тысяч чалавек — для Гродна нармальныя сярэднячкі.

У нас ёсць паблікі ў Face­book, «Вконтакте», Insta­gram, YouTube, push-паведамленні (можна на іх падпісацца і мы будзем дасылаць паведамленні ў браўзер), а ў Twit­ter ідзе аўтаматычная трансляцыя.

Вельмі дапамагае опцыя “адкладзены пост”.

Наконт трафіку з сацсетак, то ў апошні тыдзень было ажно 61 %.

Інна Грышук, намесніца рэдактара газеты “Вячэрні Гродна”:

Функцыі SMM-мэнаджара ўваходзяць у абавязкі аднаго з журналістаў. Гэтая асоба мае досвед у прасоўванні брэндаў у сацыяльных сетках.

У нас ёсць групы ў “Одноклассниках”, “Вконтакте”, Face­book ды ў Inta­gram. Паводле колькасці падпісчыкаў мы маем неблагія паказчыкі і дакладна ведаем, што гэта жывыя людзі.

Што да канцэпцыі, то для нас важна, каб у сацыяльных сетках нашыя навіны абмярковаўліся.

У залежнасці ад інтарэсаў аўдыторыі мы “посцім” адпаведныя матэрыялы. У Face­book мы робім націск на навіны эканомікі: жыллё, кошты, транспарт, “Вконтакте» — забавы і падзеі.

Ёсць шэраг навін, якія мы наўрадці будзем трансляваць праз сацсеткі, хоць безумоўна асвятляем іх як інфармацыйны рэсурс. Напрыклад, крымінал.

Трафік з сацсетак для нас, безумоўна, важны, аднак агульная тэндэнцыя такая, што людзі чытаюць у сетцы і не пераходзяць на сайт. Гэта прымушае нас думаць, як падаваць навіны, каб іх чыталі ў пабліку, а мы атрымлівалі зваротную сувязь.