Спецпраекты: як дагнаць усіх зайцоў адразу. Мінск – Вільня (да 27 верасня)

Свой спецпраект — блакітная мара многіх журналістаў. Гэта магчымасць гучна заявіць пра сябе, каб тваё імя ведалі нават тыя, хто ніколі цябе не бачыў. Не толькі чытачы, але і рэдактары буйных СМІ ў Беларусі і за мяжой.

Сотні журналістаў імкнуцца адолець гэты жанр. Але вось бяда — нягледзячы на такую колькасць удзельнікаў прафесійнага марафону, толькі адзінкі даводзяць справу да канца. Найчасцей амбітныя планы заканчваюцца публікацыяй трох-чатырох матэрыялаў, а затым усё «спускаецца на тармазах».

Удзельнікі курса «Спецпраект: як дагнаць усіх зайцоў адразу» пад куратарствам вопытных журналістаў — аўтараў і выканцаў спецпраектаў — змогуць загадзя даведацца пра ўсе «каверзы», што чакаюць на шляху да паспяховага спецпраекта.

Крок за крокам яны пройдуць яго цалкам: ад стварэння канцэпцыі да аздаблення гатовых тэкстаў. Навучаючыся на сваіх і чужых памылках. Каб затым «выстраліць» з асабістай унікальнай ідэяй, якая прынясе журналісцкую славу. 

Курс цалкам арыентаваны на практыку. Мінімум абстрактных заданняў — максімум сапраўдных задач і «хардкора».

Па выніках курса ўдзельнікі агульнымі высілкамі створаць унікальны спецпраект, які будзе апублікаваны на адным з беларускіх інтэрнэт-рэсурсаў.

Заняткі будуць праходзіць у рэжыме, набліжаным да жывога рэдакцыйнага, з планёркамі ды «мазгавымі штурмамі».

Падчас курса слухачы  даведаюцца:

- што такое спецпраект;

- якія бываюць віды спецпраектаў;

- як знайсці такую тэму, каб з мінімальнымі высілкамі дасягнуць максімальнага выніку;

- як пры мінімальным аб’еме тэкста змясціць у ім максімальны аб’ём інфармацыі;

- як рыхтаваць план і шукаць героеў;

- як разгаварыць суразмоўцаў на шчырыя гісторыі.

Пасля заканчэння курса слухачы будуць умець:  выкарыстоўваць алгарытм стварэння спецпраектаў.

Да ўдзелу запрашаюцца:  Журналісты, якія ўжо маюць прафесійны досвед, выпускнікі факультэтаў журналістыкі альбо школ маладога журналіста, а таксама студэнты з Мінска і рэгіёнаў.

Лепшыя з навучэнцаў па выніках курса атрымаюць магчымасць удзелу ў семінары за мяжой у лістападзе 2016 года.

Апісанне курса:

Курс ««Спецпраекты: як дагнаць усіх зайцоў адразу» распачнецца  1 кастрычніка 2016 года і закончыцца 27 лістапада 2016 года.

Складаецца з васьмі заняткаў у Мінску і майстар-класа замежнага трэнера ў Вільні, які пройдзе ў лістападзе.

Заняткі будуць праводзіцца па суботах з 11.00 да 14.00.

Заяўкі на ўдзел ў навучальным курсе «Спецпраекты: як дагнаць усіх зайцоў адразу» прымаюцца па электроннай пошце на адрас: baj@baj.by (з пазнакай «Special project») да 27 верасня.

Ваша заяўка павінна ўтрымліваць:

1. Кароткі расповед пра сябе (не больш за 1 000 знакаў).

2. Абгрунтаванне свайго жадання ўдзельнічаць у курсе.

Колькасць удзельнікаў абмежаваная.