У Стакгольме ставяць п’есу па кнізе Дзмітрыя Плакса пра забітага сына

Якаб Хірдваль, драматург і загадчык літаратурнай часткі Каралеўскага драматычнага тэатра ў Стакгольме, стварае п’есу па кнізе Дзмітрыя Плакса «Пётр». У гэтай кнізе беларускі рэжысёр і журналіст распавядае  пра свайго сына, жорстка забітага аднагодкам ва ўзросце 16 гадоў. Прэм’ера спектакля адбудзецца 30 жніўня ў тэатры «Арыён», распавядае найбуйнейшая шведская газета Dagens Nyheter.

Дзмітрый Плакс і Якаб Хірдваль. Foto: Roger Tures­son

Пяць гадоў таму на шаснаццацігадовага Пятра Плакса спланаваў і здзейсніў нематываваны напад ягоны сябра-аднагодак, які пакутаваў на псіхічны разлад. Дзмітрый Плакс дагэтуль цяжка перажывае смерць сына. Цяжкі маральны стан бацькі ледзьве не стаў перашкодай на шляху ўвасаблення кнігі «Пётр» у п’есу «Пётр: час», бо вядомы драматург і пастаноўшчык Якаб Хірдваль, якому Дзмітрый Плакс прапанаваў свой тэкст, асцерагаўся паглыбіць псіхічную траўму апошняга.

Дзімітрый Плакс – рэжысёр, перакладчык, паэт, пісьменнік і журналіст. Нарадзіўся ў Мінску.  Супрацоўнічаў з «Беларускай дзелавой газетай» і газетай «Имя». У 1997 годзе пераехаў у Стакгольм (Швецыя). Працаваў на Шведскім радыё, быў прадзюсерам, драматургам Радыётэатра Шведскага радыё.  Зараз – мастацкі кіраўнік Dramaten.Doc. 

Тэатральная адаптацыя будзе ўяўляць з сябе гісторыю пра бацьку, які сумуе па сваім дзіцяці і намагаецца захаваць яго жыццё, узгадваючы пра яго ўсё, што толькі магчыма. «А гэта азначае, – кажа Якаб Хірдваль, – што п’еса парадаксальным чынам будзе ўтрымліваць шмат святла, цеплыні і гумару».

«Я таму і звярнуўся да Якаба, бо ведаў, што ен усё правільна зразумее», – каментуе такую інтэрпрэтацыю Дзмітрый Плакс. Акрамя таго, што аўтары разам выбіралі актора Андрэаса Лільехольма, які будзе граць Дзмітрыя ў п’есе, больш ніякага ўдзелу ў пастаноўцы спадар Плакс не бярэ, цалкам давяраючыся рэжысёру.