У Беларусі супрацоўніка ВНУ арыштавалі за скрыншот з «Нашай Нівы»

Супрацоўніка мінскага ўніверсітэта адправілі на суткі і канфіскавалі дарагі тэлефон за скрыншот з «Нашай Нівы», паведамляе «Вясна».

Пра гэты выпадак распавяла старшыня суда Капыльскага раёна Алена Кісель, заўважылі праваабаронцы.

Вядома, што асістэнт кафедры адной з мінскіх ВНУ С. быў арыштаваны на 15 сутак згодна з пастановай суда Капыльскага раёна. Мужчыну абвінавацілі ў распаўсюдзе «экстрэмісцкіх матэрыялаў» (артыкул 19.11 Адміністрацыйнага кодэксу).

Паводле суда, ён захоўваў у тэлефоне, з мэтай распаўсюджвання, інфармацыйную прадукцыю ў выглядзе скрыншота з артыкулам, размешчаным у Telegram-канале «Наша Нiва».

Акрамя таго, паведамляецца, што ў яго быў канфіскаваны дарагі мабільны тэлефон, у якім і знайшлі скрыншот.