У Берліне ў межах кінапрэміі «Чырвоны верас» уганаравалі фільм Мары Тамковіч «У жывым эфіры»

Фільм  распавядае гісторыю затрымання журналістак «Белсата» Кацярыны Андрэевай і Дар’і Чульцовай у момант вядзення дзяўчатамі рэпартажу з «Плошчы Перамен» і выбар, перад якім яны стаяць у хвіліны, калі ў кватэру грукаюцца сілавікі.

— «У жывым эфіры» — мой кароткаметражны фільм, які быў тут намінаваны, — паказваўся на шматлікіх міжнародных фестывалях, быў адзначаны міжнародным журы, але ніколі не мог сутыкнуцца менавіта з беларускімі кінапрафесіяналамі ў такім конкурсе. Таму для мяне гэта вельмі асаблівая ўзнагарода, мне вельмі прыемна, што менавіта беларускія крытыкі адзначылі гэты фільм, — распавяла БАЖ рэжысёрка фільма Мара Тамковіч.

На дадзены момант фільм можна паглядзець толькі на фестывалях, але пад канец гэтага года стужка з’явіцца на тэлеканалах і платформах. Зараз Мара скончыла працу над сваім дэбютным поўнаметражным фільмам «Пад шэрым небам», які быў натхнёны гісторыяй журналісткі Каці Андрэевай і яе мужа Ігара Ільяша.

— У пэўным сэнсе гэта будзе працяг фільма «У жывым эфіры». Гэта спроба не столькі пражыць яшчэ раз тое, што было ў кароткім метры, але хутчэй асэнсаваць тое, што прыйшло пасля актыўных пратэстаў у 20‑м годзе. Мастацкі фільм — у моцнай палітычнай рэчаіснасці, але, перад усім, пра каханне, адданасць і спосаб захаваць сябе і адзін аднаго ў складаных абставінах, — заўважае аўтарка.

Зараз фільму патрабуецца дыстрыбуцыя і сусветная прэм’ера. Ідэя працягнуць працу над гэтай тэмай была і ў прадзюсара.

— Мне падаецца, канешне, як у рэжысёра у мяне мэта зрабіць кіно, якое выкліча эмоцыі і будзе істотным перажываннем для гледача, але я лічу вельмі важным распавядаць актуальныя беларускія гісторыі менавіта цяпер, каб мы не былі забытыя, і тыя людзі, якія гэтыя гісторыі таксама перажываюць, не былі забытыя, — падсумоўвае Мара.

Былая відэааператар, а зараз журналістка тэлеканала «Белсат» Дар’я Чульцова, адна з прататыпаў  фільма «У жывым эфіры», ужо выйшла на волю пасля двух гадоў зняволення. Кацярына Андрэева дагэтуль знаходзіцца ў засценках рэжыму з выракам 8 гадоў і тры месяца пазбаўлення волі.

Нагадаем, у лік пераможцаў Беларускай прэміі кінакрытыкаў «Чырвоны верас» увайшлі:

«Найлепшы дакументальны поўнаметражны фільм»:

• «Мара» Сашы Кулак;

• «Смеласць» Аляксея Палуяна.

«Найлепшы дакументальны кароткаметражны фільм»:

• «Маладосць па-беларуску» Ксеніі Галубовіч;

• «Метадычка» Паўла Мажара.

«Найлепшы ігравы поўнаметражны фільм»:

• «Спатканне ў Мінску» Мікіты Лаўрэцкага.

«Найлепшы ігравы кароткаметражны фільм»:

• «Смеццевая галава» Юрыя Сямашкі.

«Найлепшы анімацыйны фільм»:

• «Shirey Mara» Наты Карнеевай.

«Найлепшы(ая) рэжысёр(ка)»:

• Мікіта Лаўрэцкі за фільм «Спатканне ў Мінску».

Чытайце яшчэ:

Нармалізацыя як умова выжывання. Што цяпер асвятляюць «перафарматаваныя» выданні

«Яны баяцца і разумеюць, што нас думаць па-іншаму не прымусіш». Інтэрв’ю з Вольгай Такарчук

Васіль Калач: «Для Беларусі гэта неадпрацаваная карма — вярнуць памяць пра шляхту»