Улады Турцыі закрылі больш за сотню СМІ (Абноўлена)

Права ўрада на забарону распаўсюду СМІ прадугледжана рэжымам надзвычайнага становішча, які быў абвешчаны ў Турцыі пасля спробы ваеннага перавароту.

Сярод закрытых выданняў апынуліся агенцтва і радыё Cihan, газеты Zaman і Today’s Zaman, якія ўваходзяць у холдынг Feza. Холдынг звязваюць з рухам «Хізмет» Фетхуллаха Гюлена, якога ўлады Турцыі называюць ідэолагам бунту.

Прэзідэнт Міжнароднай федэрацыі журналістаў (МФЖ) Філіп Леру заявіў, што “ЕС павінен патрабаваць адказу ад прэзідэнта Эрдагана за парушэнне канвенцыі аб правах чалавека і наcтуп на прэсу. Журналісты па ўсім свеце моцна занепакоеныя ростам колькасці замахаў на прэсу ў краіне, якая называе сябе дэмакратычнай. Гэтая сітуацыя павінна спыніцца”.

Прэзідэнт Еўрапейскай федэрацыі журналістаў (ЕФЖ) Могенс Бліхер‑Б’ерэгард і генеральны сакратар ЕФЖ Рыкарда Гуцьерэс заклікалі да дзеяння Савет Еўропы. Паводле інфармацыі ЕФЖ, былі выдадзены ордэры на арышт 42 журналістаў.

“Мы заклікаем НДА і міжнародную супольнасць націснуць на турэцкі ўрад, каб узнавіць вяршэнства права. Усё больш журналсітаў сутыкаюцца з запалохваннямі і арыштамі, і гэтая зачыстка павінна неадкладна спыніцца. Мы заяўляем пра нашу салідарнасць з турэцкімі калегамі”, – заявіў прэзідэнт ЕФЖ Могенс Бліхер‑Б’ерэгард.

Па інфармацыі Amnesty Inter­na­tion­al (на 26 ліпеня):

Як мінімум 208 чалавек былі забітыя і звыш 1 400 – параненыя падчас няўдалай спробы перавароту ў Стамбуле і Анкары.

Звыш 10 000 чалавек былі затрыманыя ад пачатку перавароту.

Звыш 45 000 чалавек былі звольненыя з працы, у тым ліку паліцыя, суддзі і пракуроры, і інш.

Было выдадзена 42 ордэры на арышт журналістаў (на 25 ліпеня 2016), шэсць ужо затрыманыя (на 26 ліпеня).

20 навінавых сайтаў былі заблакаваныя ў дні пасля спробы перавароту.

На 3 месяцы ўведзена 20 ліпеня надзвычайнае становішча, што дазваляе прэм’еру і прэзідэнту кіраваць дэкрэтамі ў абыход парламента.

23 ліпеня тэрмін дасудовага затрымання быў павялічаны з 4 да 30 дзён – паводле першага дэкрэту, выдадзенага ў часе надзвычайнага становішча.

15-ы Aртыкул Турэцкай Канстытуцыі пастанаўляе, што ўлады не могуць “прыпыніць” дзеянне Еўрапейскай Канвенцыі па правах чалавека; нават у надзвычайным становішчы Канстытуцыя дазваляе толькі абмежаваць некаторыя правы.