Верш Андрэя Аляксандрава загучаў па-ангельску. Акцыя да 1000 дзён зняволення медыяменеджэра

Верш, які раней даслаў зняволены журналіст з‑за кратаў, быў перакладзены паэткай Ганнай Комар на ангельскую мову. Радкі зачыталі праваабаронцы і выдаўцы, якія асабіста ведаюць Андрэя Аляксандрава.

Гаворка пра верш, які аўтар назваў сцісла і вельмі сімвалічна — з дапамогай знака #. Радкі атрымаліся надзвычай эмацыянальнымі. Тэкст шырока разышоўся.

«Індэкс цэнзуры» прапануе распаўсюджваць відэа па сацсетках з хэштэгам #1000Days.

Арыгінальны тэкст на беларускай мове, які агучыла паэтка Ганна Комар, наступны:

#

Калі на неба глядзіш праз краты,

не бачыш кратаў, а бачыш неба.

Учорашні хлеб пахне цвіллю і стратай,

а заўтрашні пахне сапраўдным хлебам.

Ты кажаш: неба — падман аптычны.

Але падман —гэта краты, вер мне!

Бо краты — толькі хэштэг,

як звычка,

А гэты хэштэг зараз проста ў трэндах.

Ды справы няма да хэштэгаў небу,

пра трэнды неба зусім не ў курсе,

яно пад нагамі не чуе глебы,

не лічыць стагоддзяў і хлебных лустаў.

І неба цягне аблокаў вату

над часам — адзінае, што жыве.

І неба таксама не бачыць кратаў,

калі ўглядаецца ў неба ўва мне.

Чытайце яшчэ:

«Ён шчыры патрыёт Беларусі». Хто такі Андрэй Аляксандраў, якога абвінавачваюць у здрадзе дзяржаве

«Калі на неба глядзіш праз краты». Андрэй Аляксандраў даслаў з турмы верш пад назвай «#»

Выпісвае «Прессбол», заняты на дрэваапрацоўцы. Як адбывае жорсткі тэрмін Андрэй Аляксандраў