• Актуальнае
  • Медыяправа
  • Карыснае
  • Накірункі працы і кампаніі
  • Агляды і маніторынгі
  • Рэкамендацыі па бяспецы калег

    Задушыць штрафамі? Журналістку Аліну Скрабунову дзясяты раз за сакавік пакаралі за прафесійную дзейнасць

    Суд Кастрычніцкага раёна Магілёва 18 сакавіка зноў пакараў штрафам за незаконны выраб прадукцыі СМІ журналістку Аліну Скрабунову. Суддзя Вольга Краўчанка прызначыла ёй штраф у памеры 30 базавых велічынь (870 рублёў) за сюжэт, які выйшаў у праграме "Навіны" на тэлеканале "Белсат".

     

    У сюжэце распавядалася пра крымінальны працэс над магіляўчанінам Сяргеем Базука, якога абвінавачваюць, што ён раскідаў самарэзы перад будынкамі сілавых ведамстваў у Магілёве.

    Пры разглядзе справы Скрабуновай ў судзе былі выкарыстаныя фотаздымкі, якія захоўваліся ў ноўтбуку журналісткі — камп’ютар  міліцыянты забралі ў яе пасля ператрусу ў кватэры. Падобныя фотаздымкі фігуравалі ў артыкуле пра Базука на сайце тэлеканала “Белсат”. Для суддзі Краўчанка гэтага было дастаткова, каб прызнаць Аліну Скрабунову вінаватай у незаконным вырабе прадукцыі СМІ і аштрафаваць яе за парушэнне ч.3 арт. 23.5 КаАП.

    Нагадаем, гэта ўжо дзясяты штраф журналістцы ад пачатку сакавіка гэтага года. Агульная сума штрафаў Скрабуновой склала 7540 рублёў.

    За апошнія гады ў Магілёве часцей за ўсё штрафы паводле ч. 2 арт. 22.9 КаАП, якой зараз у новай рэдакцыі Кодэкса аб адміністрацыйных правапарушэннях адпавядае ч. 3 арт. 23.5, атрымлівалі журналістка Аліна Скрабунова і відэаператар Аляксандр Сідарэўскі.

    Зараз Скрабунова і Сідарэўскі знаходзяцца за межамі Беларусі. Раней у гутарцы з карэспандэнтам службы маніторынгу ГА “БАЖ” Аліна Скрабунова запэўніла, што ў хуткім часе яны збіраюцца вярнуцца, каб і далей працягваць сваю працу ў Магілёве.

    Сябры ГА “БАЖ” з Магілёва выказалі меркаванне, што эпапея са штрафамі Аліне Скрабуновай у судах Магілёва з’яўляецца своеасаблівым ціскам, каб у яе прапала ўсялякае жаданне вяртацца на радзіму — бо непад’ёмныя штрафы выплаціць вельмі складана.

    Самыя важныя навіны і матэрыялы ў нашым Тэлеграм-канале — падпісвайцеся!
    @bajmedia
    Найбольш чытанае
    Кожны чацвер мы дасылаем на электронную пошту магчымасці (гранты, вакансіі, конкурсы, стыпендыі), анонсы мерапрыемстваў (лекцыі, дыскусіі, прэзентацыі), а таксама самыя важныя навіны і тэндэнцыі ў свеце медыя.
    Падпісваючыся на рассылку, вы згаджаецеся з Палітыкай канфідэнцыйнасці