Заява ГА «БАЖ» і Беларускага ПЭН-цэнтра з нагоды прысуду Марыне Золатавай

Марына Золатава — адзіная асоба, крымінальная справа якой была перададзена ў суд па так званай “справе БелТА”. Астатнія фігуранты справы (не менш за 14 чалавек), якія абвінавачваліся ў несанкцыяваным доступе да інфармацыі дзяржаўнага інфармагенцтва (ч. 2 арт. 349 Крымінальнага кодэкса), былі вызвалены ад крымінальнай адказнасці з прыцягненнем да адміністрацыйнай адказнасці ў выглядзе буйных штрафаў і фактычным прымусам да выплаты кампенсацый дзяржаўным медыям БелТА і “СБ.Беларусь сегодня”. Памер кампенсацыі вызначаўся па методыцы, якую нельга прызнаць справядлівай і абгрунтаванай.

ГА “БАЖ” і іншыя праваабарончыя арганізацыі ад пачатку звязвалі так званую “справу БелТА” з ціскам на свабоду слова. Ператрусы ў кватэрах журналістаў і рэдакцыях, кароткачасовыя затрыманні журналістаў і рэдактараў (пераважна — жанчын), адабранне прафесійнай тэхнікі, неабходнай для працы журналістаў і рэдакцый падчас папярэдняга следства па крымінальнай справе, выглядалі яўна празмернымі і накіраванымі на запужванне журналісцкай супольнасці.

Падчас судовага працэсу стала вядома пра праслухоўванне тэлефоных размоў Марыны Золатавай і некаторых журналістаў задоўга да ўзбуджэння крымінальнай справы. Шэраг журналістаў у судовым працэсе заявілі, што супрацоўнікі Следчага камітэту аказвалі ціск на іх падчас допытаў з мэтай атрымаць паказанні супраць Марыны Золатавай.

Само абвінавачанне ў бяздзейнасці службовай асобы выглядае спробай прыцягнуць яе да крымінальнай адказнасці любымі сродкамі. Пра палітычны характар пераследу сведчаць і празмернасць асабістага дагляду прысутных падчас разгляду судовай справы у будынку суда.

ГА “БАЖ” і Беларускі ПЭН-цэнтр заклікаюць улады Беларусі:

• неадкладна спыніць непрапарцыйнае ўмяшальніцтва дзяржаўных органаў у працу журналістаў і недзяржаўных СМІ;

• прыняць меры для адмены прысуду Марыны Золатавай і вызваліць яе ад крымінальнай адказнасці.

Мы ўпэўненыя, што жорсткія меры супраць журналістаў, якія праходзілі па “справе БелТА”, не паўплываюць на рэдакцыйную палітыку незалежных медыяў.

4 сакавіка 2019 года

ГА «Беларуская асацыяцыя журналістаў»

Беларускі ПЭН-цэнтр

Да заявы далучыліся:

- Праваабарончы цэнтр «Вясна»

- Рэспубліканскае грамадскае аб’яднанне «Прававая ініцыятыва»

- Ініцыятыўная група «Ідэнтычнасць і права»

- Экспертна-прававое таварыства «Ініцыятыва FORB»

- Асветніцкая ўстанова «Цэнтр прававой трансфармацыі»

- Публічная ўстанова «Беларускі дакументацыйны цэнтр»

- Асветніцка-дабрачынная ўстанова «Камітэт «Салідарнасць»

- Асамблея НДА

- Рэспубліканскае грамадскае аб’яднанне «Беларускі Хельсінкскі Камітэт»

- Установа «Кансультацыйны цэнтр па актуальных міжнародных практыках і іх імплементацыі ў праве «Хьюман Канстанта»

Бастунец прысуд Золатавай зьвязвае з набліжэньнем выбараў

Арлем Дэзір: Прысуд Золатавай можа негатыўна паўплываць на незалежныя СМІ ў Беларусі

Зісер пра вырак Золатавай: «Гэта яшчэ мяккі прысуд, і я лічу яго перамогай»