Журналісты і праваабаронцы абмеркавалі ў Брэсце праблемы ўцекачоў

Мерапрыемства ладзілася з ініцыятывы некамерцыйнай арганізацыі “За свой горад”, а сярод удзельнікаў дыскусіі былі прадстаўнікі некамерцыйнай арганізацыі «Роўнасць і справядлівасць», Беларускага Хельсінкскага Камітэта, Аб’яднанай грамадзянскай партыі, Беларускай сацыял-дэмакратычнай партыі (Грамада), Інстытута прагназавання і рэгулявання палітычных канфліктаў (Расія), незалежныя эксперты, праваабаронцы і журналісты.

“Тэма уцекачоў — адна з актуальных сучасных праблем шмат для якіх краін і цэлых рэгіёнаў, — распавёў падчас круглага стала кіраўнік арганізацыі “За свой горад” Ігар Маслоўскі. — Не абыходзіць яна бокам ні Беларусь, ні Брэсцкую вобласць. Транзітныя мігранты з Каўказа, уцекачы з усходу Украіны, запланаванае будаўніцтва міграцыйных цэнтраў за кошт сродкаў ЕС — усё гэта новыя выклікі для нашага рэгіёна”.

Падчас мерапрыемства была зроблена спроба даць аб’ектыўную ацэнку сучаснай сітуацыі ў справе міграцыі праз Беларусь, зрабіць аналіз магчымых пагрозаў ад гэтага працэсу, а таксама выпрацаваць шэраг прапаноў, якія варта рэалізаваць на дзяржаўным і грамадскім узроўні для мінімізацыі наступстваў гэтых пагроз.

Дырэктар НКА “Інстытут прагназавання і ўрэгулявання палітычных канфліктаў” з расійскага Ніжняга Ноўгарада Мікалай Нікалаеў адзначыў, што тэма міграцыі з’яўляецца вельмі злабадзённай для Расіі.

Паводле ацэнкі экспертаў, у Расіі зараз ад 10 да 12 мільёнаў нелегальных мігрантаў, таму адкрытая мяжа з Беларуссю нясе патэнцыяльную пагрозу для нашай краіны.

Асобна Нікалаеў спыніўся на тэме мігрантаў з Чачэнскай Рэспублікі, для якіх Брэст з’яўляецца транзітным горадам. Паводле слоў расійскага эксперта, неабходна ў першую чаргу прымаць меры і выпраўляць сітуацыю ў самой Расійскай Федэрацыі (асабліва — ў каўказскім рэгіёне), каб утаймаваць гэтыя міграцыйныя патокі.

Эксперт у галіне міграцыйнага права Сяргей Магонаў у сваім выступе зрабіў аналіз міграцыйнага заканадаўства Беларусі і практыку яго прымянення, а таксама падрабязна спыніўся на статыстычных дадзеных, што сведчаць пра колькасць мігрантаў у Беларусі і тых, хто атрымоўвае статус уцекача.

Удзельнікі круглага стала прыйшлі да высновы, што міграцыйную тэму не варта замоўчваць (у тым ліку ў сродках масавай інфармацыі), а шырокае абмеркаванне і грамадскія дыскусіі могуць даапамагчы мінімізаваць непажаданыя наступствы гэтага працэсу і распрацаваць шляхі для пераадолення магчымых негатыўных вынiкаў.