Новы сайт «Брестской газеты» прызнаны «экстрэмісцкай інфармацыйнай прадукцыяй»

Недзяржаўнае выданне «Брестская газета» было заснавана ў 2002 годзе, і да 2020 года выходзіла ў папяровай версіі. Але выпуск газеты быў прыпынены пасля афіцыйнага ліста з друкарні аб скасаванні дамовы на друк.  Спробы знайсці друкарню ў іншым горадзе краіны таксама не далі плёну.  «Брестская газета» цалкам перайшла ў  інтэрнэт: у выдання заставаўся сайт, створаны яшчэ ў 2009 годзе,  таксама інфармацыя распаўсюджвалася і праз сацыяльныя сеткі.

8 ліпеня 2021 года прадстаўнікі КДБ зладзілі ператрусы  ў офісе рэдакцыі  і ў кватэрах пяці яе супрацоўнікаў. З рэдакцыі сілавікі вывезлі абсалютна ўсю тэхніку, нават маніторы. У канцы лістапада 2021 года, пасля судовай пастановы аб прызнанні матэрыялаў  анлайн-выдання «экстрэмісцкімі», сайт «Брестской газеты» быў заблакаваны і  дасяжны толькі праз VPN. Праз пэўны час анлайн-выданне памяняла адрас у інтэрнэце.

 Інфармацыя даходзіла да чытачоў і праз сацыяльныя сеткі. Зрэшты, рэпрэсіўныя захады сягнулі і туды: напрыклад, 12 студзеня  суд Ленінскага раёна Брэста прызнаў «экстрэмісцкай інфармацыйнай прадукцыяй» старонку «Брестской газеты» у Фэйсбуку.

Акрамя «Брестской газеты», 15 студзеня той самы суд Ленінскага раёна Брэста прызнаў «экстрэмісцкімі» яшчэ некалькі рэгіянальных інтэрнэт-рэсурсаў, у тым ліку ютуб-канал «Першы Рэгiён». Крыху раней, 9 студзеня, у Рэспубліканскі  спіс экстрэмісцкіх матэрыялаў трапіў  акаўнт у сацыяльнай сетцы Х, які належыць незалежнаму інтэрнэт-выданню «Першы рэгіён». Сам сайт «Першы рэгіён», які асвятляе падзеі ў Брэсцкай вобласці, быў прызнаны «экстрэмісцкімі матэрыяламі» яшчэ ў снежні 2021 года, і тады ж быў заблакаваны доступ да яго чытачам на тэрыторыі Беларусі.

Цягам 2022 года ў «экстрэмісцкі» пералік трапілі Viber-чат з назвай 1RegBY, Telegram-канал «Першы рэгіён», афіляваныя з выданнем акаўнты ў Face­book і Insta­gram. Два дні таму туды ж дадалі старонку  «Першага Рэгіёна» у сацыяльнай сетцы «Вконтакте», але зрабілі гэта з памылкамі, таму фармальна сапраўдны акаўнт «Першага Рэгіёна» у згаданай сацсетцы яшчэ не мае «эктрэмісцкага» статуса. 

Чытайце яшчэ:

«Фінансаванне беларускіх медыяў пагаршаецца. Усё больш адчуваецца канкурэнцыя з боку расійскіх СМІ». Што рабіць?

«Прыярытызацыя беларускага кантэнту над расійскім». Святлана Ціханоўская перадала ў Google запыт ад журналістаў

Сына пісьменніка і журналіста Сяргея Антонава затрымалі за абразу Лукашэнкі