Дзе размаўляць беларусам? Вялікі агляд мэсэнджараў і іх бяспекі

Жанчына са смартфонам. Здымак мае ілюстрацыйны характар. Фота: Iam Hogir / Pex­els

Прэм’ер-міністр Злучанага Каралеўства Кір Стармэр нядаўна прызнаўся, што кіраўнікі дзяржаваў камунікуюць пра важныя пытанні ў групах у What­sApp. А раней праз выпадковае запрашэнне журналіста ў чат сталася вядома, што амерыканскае кіраўніцтва дзеліцца планамі вайсковых аперацыяў у Sig­nal. 

Беларусы могуць карыстацца і тым, і тым. Праўда, найбольш любяць Telegram – у Sig­nal і What­sApp няма каналаў з навінамі і мэмамі. 

Telegram агулам дастаткова бяспечны як праграма, але праблема ў тым, што на яго звяртаюць асаблівую ўвагу сілавікі. Каб павялічыць бяспеку Telegram, беларускія «Кіберпартызаны» стварылі адмысловы «Партызанскі Telegram». Ды з’яўляюцца і вельмі падазроныя версіі Telegram, як то Tel­ega, якая дае распрацоўнікам чытаць перапіскі карыстальнікаў. Праз падазрэнні наконт бяспекі Tel­ega выдалілі з Apple App­Store, але праграма яшчэ даступная ў Google Play­Store.

У Расеі ж блакуюць мноства праграмаў для сувязі – інтэрнэт там ператвараецца ў «Чабурнэт». А шмат каму з беларусаў трэба трымаць сувязь з людзьмі ў Расеі – сваякамі, сябрамі, супрацоўнікамі. Таму некаторыя ўсталёўваюць расейскі мэсэнджар Max, які збірае вельмі шмат звестак і можа перадаваць іх сілавікам у Расеі і тэарэтычна ў Беларусі. Магчыма, таксама праз падазрэнні наконт бяспекі Max знік з App­Store 3 чэрвеня.

Бяспечных мэсэнджараў, дасяжных у Расеі без VPN, застаецца ўсё менш, але там увесь час шукаюць шляхі абыходу (некаторыя старажылы дасталі з пыльнай шуфлядкі Jab­ber, а некаторыя пайшлі аж у кітайскі WeChat), нават з «архіворагам» Telegram абыходзяць блакаванні.

А куды ісці? Самыя бяспечныя мэсэнджары далёка не самыя папулярныя, самыя папулярныя адносна бяспечныя – заблакаваныя ў Расеі, вядомыя незаблакаваныя ў Расеі – небяспечныя… Разбіраемся па парадку.

7 способов, которыми российский мессенджер Max следит за пользователями

Самыя вядомыя

Dis­cord – платформа, папулярная сярод аматараў відэагульняў, але ніхто не забараняе стварыць у ёй, напрыклад, сямейны сервер. Перапіска там не мае канцавога шыфравання, але аўдыя- і відэазванкі – маюць. 

Face­book – далёка не самая папулярная сацсетка ў Беларусі. Але Face­book Mes­sen­ger – даволі бяспечны і мае канцавое шыфраванне перапіскі, аўдыя- і відэазванкоў. Аднак Face­book трапляў у розныя скандалы, звязаныя з прыватнасцю і асабовымі звесткамі. Самага рызыкоўнага яму ўсё адно лепш не давяраць. Да таго ж, у Insta­gram раптоўна адключылі канцавое шыфраванне, а пра гэта ведае не кожны. Гэтак жа могуць калі-небудзь адключыць канцавое шыфраванне на Face­book.

iMes­sage – сэрвіс Apple, які замяняе SMS на iPhone. Між карыстальнікамі iMes­sage («сінія кружочкі») працуе канцавое шыфраванне. З карыстальнікамі Android («зялёныя кружочкі») перапіска ідзе праз незашыфраваныя SMS ці MMS. Шыфраваныя RCS-паведамленні з Android-карыстальнікамі на момант публікацыі толькі пачынаюць уключаць у бэта-версіі. Face­Time – сэрвіс Apple для відэазванкоў з канцавым шыфраваннем. Што дзіўна, на момант публікацыі iMes­sage працуе ў Расеі, хоць Face­Time заблакаваны.

Max – расейскі мэсэнджар, створаны нібы найперш для сачэння. Лепш не карыстацца ім. Калі няма выбару (суразмоўца ў Расеі не можа ўсталяваць нічога іншага), лепш усталяваць Max на асобную прыладу – напрыклад, стары непатрэбны тэлефон, на якім не будзе ніякіх іншых праграмаў і звестак. І не казаць нічога такога, што зацікавіць расейскіх ці беларускіх сілавікоў.

Sig­nal – амаль ідэальны мэсэнджар у плане бяспекі. Але ёсць некалькі мінусаў. Ён не настолькі папулярны, як Telegram, а яго наяўнасць можа выклікаць пытанні ў сілавікоў пры «правяранні тэлефона». Ён абавязкова патрабуе нумар тэлефона для рэгістрацыі (а беларускія аператары пачалі блакаваць рэгістрацыю ў ім). І ён збірае на сваім серверы звесткі пра кантакты карыстальніка.

Slack – папулярная праграма для працоўнай камунікацыі. Але яна не самая бяспечная для карыстальнікаў: паведамленні можа чытаць адміністратар, а аўдыя- і відэаразмовы не маюць канцавога шыфравання.

Snapchat – праграма, якой шмат хто давярае інтымную камунікацыю. Магчыма, здарма: праграма не створаная для максімальнай бяспекі камунікацыі, не мае канцавога шыфравання для перапіскі – толькі для абмену фота і відэа «сам-насам».

Teams ад Microsoft – яшчэ адна праграма для працоўнай камунікацыі. Перапіску ў ёй можа чытаць адміністратар. Але адміністратар можа ўключыць канцавое шыфраванне пэўных аўдыя- і відэазванкоў.

What­sApp – праграма, якая прапануе канцавое шыфраванне перапіскі, аўдыя- і відэазванкоў. Яна выглядае даволі бяспечнай, але ўсё ж належыць Face­book, які трапляў у скандалы з прыватнасцю і асабовымі звесткамі. І яна мае закрыты зыходны код.

X – сацсетка, якая на момант публікацыі запускае асобную праграму для камунікацыі X Chat. Бяспека перапіскі ў ім выклікае пэўныя пытанні. Дый уласнік X трапіў у скандал з вялікім крадзяжом асабовых звестак амерыканцаў.

Менш папулярныя праграмы для размоваў. Выява: Белсат

Малавядомыя