Прэс-тур ад «Аховы птушак Бацькаўшчыны» ПРАЙШОЎ

Мёрскі край робіцца ўсё больш прывабным турыстычным кірункам, за апошнія два гады вырасла колькасць магчымасцяў для цікавых падарожжаў, жыхары раёна пастаянна прапануюць новыя цікавосткі.

Многія толькі ў пандэмію пачалі адкрываць для сябе беларускія мясціны. На прэс-туры вы самі пабудзеце ў ролі турыста і зразумееце, чым можа здзівіць Мёрскі край.

Прэс-тур адбудзецца ў межах праекта “Разам для грамады і прыроды: Міёрскі раён”, які рэалізуецца Міёрскім райвыканкамам, грамадскай арганізацыяй “Аховай птушак Бацькаўшчыны” і Латвійскім сельскім форумам пры фінансавай падтрымцы Еўрапейскага саюза.

Мы прыедзем на поўнач Беларусі, у вёску Пераброддзе, якая колісь была горадам з Магдэбургскім правам. Там збяруцца гаспадары аграсядзіб, майстры, мясцовыя фермеры і гіды, якія робяць экскурсіі па балотах і рэках. У кожнага з іх для турыстаў ёсць адмысловыя цікавосткі, з якімі вы пазнаёміцеся ў інтэрактыўным фармаце майстар-класаў і дэгустацый.

Хтосьці праводзіць майстар-класы па вырабе сувеніраў з прыродных матэрыялаў, хтосьці вучыць старасвецкім танцам, хтосьці знаёміць з лекавымі травамі, што растуць пад нагамі, хтосьці сам вырабляе тварожныя сыркі ці пернікі. Адны прапаноўваюць тур на дзікае балота, другія – сплаў па рэчках, трэція – гастратур, іншыя — велавандроўку.

Некаторыя з гэтых актыўнасцяў для турыстаў сталі магчымымі толькі цяпер у межах ініцыятыў мясцовых жыхароў, арганізаваных дзякуючы праекту.

Міёрскі край мае чым здзівіць. У вас ёсць магчымасць гэта ацаніць і расказаць чытачам пра мясцовыя цікавосткі.

Усіх удзельнікаў прэс-туру чакаюць душэўныя сувеніры!

Калі ласка, паведаміце пра свой удзел у прэс-туры Алесі Башарымавай да 19 траўня ўключна на адрас basharymava@ptushki.org або па тэлефонах +375447473662, +375298473662. Абавязкова пазначце, калі маеце асаблівасці харчавання (напрыклад, не ясцё яйкі, рыбу, мяса або малочныя прадукты). Мы падрыхтуем сухі паёк у дарогу, а ў Пераброддзі вы зможаце падмацавацца аўтэнтычнымі вясковымі стравамі падчас кава-паўзы.

Калі ласка, устрымайцеся ад паездкі, калі маеце сімптомы прастуды ці пачуваецеся блага. Маскамі і антысептыкам мы забяспечым.

Усе акрэдытаваныя журналісты атрымаюць спіс з кантактамі мясцовых гідаў, аграэкасядзіб і фермераў.