Сёмы Летнік разнастайнасці набірае ўдзельнікаў і ўдзельніц (дэдлайн — 3 ліпеня)

Праваабарончая ініцыятыва «Журналісты за талерантнасць» (J4T) запрашае на Летнік разнастайнасці.

Ужо сёмы год ініцыятыва «Журналісты за талерантнасць» стварае прастору, дзе можна лепш пазнаць сябе, пераасэнсаваць уласныя перакананні і стэрэатыпы, навучыцца па-новаму будаваць камунікацыю з іншымі людзьмі і супольнасцямі. Праз досвед, гульнявыя фарматы і сумесную працу ўдзельнікі і ўдзельніцы даследуюць тэмы разнастайнасці, інклюзіі, ксенафобіі і правоў чалавека. 

Гэтым разам Летнік адбудзецца 13–17 жніўня 2026 года бліз Варшавы, Польшча.

Для каго Летнік?

Місія J4T – спрыяць культуры талерантнасці ды інклюзіі ў беларускім грамадстве праз медыя, культуру і камунікацыю. Таму на Летнік запрашаюць тых, хто працуе ў галіне распаўсюду інфармацыі і стварэння культурных сэнсаў:

• журналіст:аў і рэдактар:ак,
• блогер:аў і інфлюэнсер:ак,
• аўтара:к падкастаў і вядоўцаў шоў,
• пісьменніц і пісьменнікаў,
• прадстаўні:ц культурнай і мастацкай сферы,
• квір-актывістак і актывістаў.

Што будзе?

Плануецца 4 насычаныя дні нефармальнай адукацыі, інтэрактыву і актыўнага ўдзелу. Аснова Летніка – навучанне праз досвед, перажыванне і гульнявыя фарматы.

На Летніку будзе магчымасць:

• паглыбіцца ў тэму правоў чалавека на базавым узроўні,
• даведацца больш пра тэмы ксенафобіі, талерантнасці, уплыву стэрэатыпаў, стану ўразлівых групаў у грамадстве,
• прыняць удзел у форум-тэатры і даследаваць сацыяльныя сітуацыі праз дзеянне і рэфлексію,
• пазнаёміцца са сваёй ксенафобіяй у межах адукацыйнага ларпу,
• навучыцца бачыць праявы стыгматызацыі і дыскрымінацыі ды даведацца, як пазбягаць іх у прафесійнай журналісцкай, пісьменніцкай ды актывісцкай дзейнасці.

Чаго чакаюць ад удзельніц ды ўдзельнікаў?

• Наяўнасці досведу ў журналістыцы / распаўсюдзе інфармацыі / пісьменніцтве / мастацтве.
• Зацікаўленнасці тэмамі правоў чалавека, ксенафобіі і недыскрымінацыі.
• Удзелу ўва ўсіх мерапрыемствах на працягу Летніка і гатоўнасці працаваць у камандзе з іншымі.
• Гатоўнасці актыўна выкарыстоўваць набытыя веды і навыкі ў прафесійнай і актывісцкай дзейнасці. 

Як падаць заяўку

Колькасць месцаў абмежаваная. Для ўдзелу ў адборы трэба запоўніць гэтую форму да 3 ліпеня 2026 года ўключна.

У форме трэба пакінуць кантакты прадстаўні:ц беларускіх медыя і НДА, якія могуць вас верыфікаваць.

• Удзел у школе бясплатны: J4T бярэ на сябе выдаткі па арганізацыі праграмы, па запрашэнні экспертак, па арганізацыі харчавання і пражывання на лакацыі.
• Ёсць магчымасць забяспечыць квіткамі на дарогу да Варшавы тых, каму гэта патрэбна.
• Адабраныя ўдзельні:цы бяруць на сябе выдаткі на страхоўку на тэрыторыі Польшчы падчас знаходжання на Летніку.
• Візавая падтрымка не забяспечваецца. 
• Чакаецца поўнае ўключэнне ў працоўныя працэсы Летніка.

Пра вынікі адбору паведамяць пасля 13 ліпеня.

Летнік Разнастайнасці – гэта таксама супольнасць. За сем гадоў сфармавалася сетка выпускні:ц, якія выкарыстоўваюць атрыманы досвед і веды ў сваёй прафесійнай дзейнасці, грамадскай працы і штодзённым жыцці. Удзельні:цы гэтага года таксама змогуць далучыцца да інклюзіўнай супольнасці.

Калі засталіся пытанні, можна пісаць на event@j4t.info