Магілёў: выдаленне фотаздымкаў з камеры журналіста прызналі “законным і абгрунтаваным”

Нагадаем, што 21 жніўня супрацоўніца Дэпартамента аховы МУС Ілона Міхайлава прымусіла журналіста выдаліць з фотакамеры ўсе фотаздымкі пасля таго, як ён сфатаграфаваў інфармацыйны стэнд з абвесткай пра прэзідэнцкія выбары.

Сам Буракоў сцвярджае, што фатаграфаваў толькі стэнд і шыльду выбарчай камісіі, а сам будынак адміністрацыі Ленінскага раёна ў кадр не трапляў.

У адказе на скаргу начальнік Ленінскага аддзела Дэпартамента аховы А. Несцярэнка паведаміў журналісту, што выкладзеныя Бураковым заўвагі “не знайшлі аб’ектыўнага пацвярджэння”.

Спадар Несцярэнка лічыць, што дзеянні Ілоны Міхайлавай былі законнымі і абгрунтаванымі і адпавядалі зацверджаным інструкцыям. Аб’ектыўна спраўдзіць ці абвергнуць інфармацыю пра тое, што на фотаздымках былі толькі выявы стэнда пра выбары і шыльда выбарчай камісіі, а не фасад будынка адміністрацыі, зараз немагчыма, бо здымкі ўжо выдаленыя.

Сам Аляксандр Буракоў вельмі расчараваны атрыманым адказам, бо спадар Нецярэнка фактычна нічога не адказаў па сутнасці выкладзеных у яго скарзе заўваг. Ён так і не патлумачыў, якая інструкцыя ці які іншы дакумент забараняе рабіць фотаздымкі інфармацыйных стэндаў альбо адміністрацыйных будынкаў і ў чым была неабходнасць выдалення фотаздымкаў з камеры журналіста.

Па словах журналіста, 7 верасня яго наведваў намеснік камандзіра батальёна аховы Манкевіч, які ўзяў у яго тлумачэнні і з якім у журналіста адбылася даволі канструктыўная гутарка. Падчас сустрэчы спадар Манкевіч азнаёміў Буракова з матэрыяламі службовай праверкі на 20 лістах, а таксама паведаміў пра адмысловы загад міністра ўнутраных спраў, які забараняе фатаграфаваць адміністрацыйныя будынкі. Прыняццё загаду нібыта было выклікана тым, што ў Гомелі грамадзянін Расіі фатаграфаваў адміністрацыйныя будынкі з незразумелымі мэтамі. Таксама супрацоўнік міліцыі паведаміў журналісту, што, паколькі фотаздымкі выдаленыя, ён не зможа даказаць, што фатаграфаваў менавіта інфармацыйны стэнд.

МУС адмовілася сустракацца з кіраўніцтвам ГА “БАЖ” адносна фатаграфавання адміністрацыйных будынкаў

ГА «БАЖ» будзе абскарджваць дакумент, што абмяжоўвае фатаграфаванне адміністрацыйных будынкаў

Будынкі забаранілі здымаць пасля затрымання расійскага дыверсанта?

ГА “БАЖ” просіць МУС прадаставіць копію “ўказання” пра фатаграфаванне адміністрацыйных будынкаў