Шорт-ліст у намінацыі «Медыяактыўнасць года» прэміі “Чэмпіёны грамадзянскай супольнасці”
3 студзеня 2020
9 студзеня 2020 года Асамблея НДА абвесціць лаўрэатаў і лаўрэатак прэміі “Чэмпіёны грамадзянскай супольнасці”.
Аб'яўлены шорт-ліст намінатаў.
Прапануем спіс прэтэндэнтаў на перамогу ў намінацыі "Медыяактыўнасць года".
Медыяактыўнасць года
Уручаецца найбольш прыкметнаму ў бягучым годзе медыя няўрадавай арганізацыі ці ініцыятывы (сайту / блогу / суполцы ў сацыяльнай сетцы / іншаму мэдыярэсурсу). Улічваюцца ахоп і ангажаванасць аўдыторыі, арыгінальнасць кантэнта, абнаўляльнасць, зручнасць падачы інфармацыі, карысць для мэтавай аўдыторыі і прамоцыі грамадзкай дзейнасці ў Беларусі.
Тэлеграм-канал «Варушыся». Бясплатныя стажыроўкі і трэнінгі, магчымасці фармальнай і нефармальнай адукацыі. 3400 падпісчыкаў.
«Медыярашэбнік»: Як пісаць пра розных людзей. Школа журналістаў IBB cупольна з праваабарончымі арганізацыямі выдалі дапаможнік для журналістаў, які распавядае, як карэктна пісаць пра ўразлівыя групы. Дапаможнік апублікаваны ў выглядзе электроннага інтэрактыўнага рэсурса. Ён будзе карысны журналістам, якія імкнуцца да павышэння свайго прафесійнага ўзроўню ў асвятленні сацыяльных тэмаў, кіруючыся нормамі журналісцкай этыкі.
Інстаграм-шоў «МоваЧэлендж». Першае інстаграм-шоў па-беларуску. Падчас шоў у герояў быў месяц, каб пачаць размаўляць па-беларуску, і з кожным заданнем яны ўсё болей выкарыстоўвалі беларускую мову у сваім жыцці. Шоў транслявалася ў фармаце сторыз у інстаграме @artsiadziba, а таксама на старонках удзельнікаў.
Андрэй Павук і youtube-канал «Рудабельская паказуха». Падымае вострыя пытанні мясцовага жыцьця ў крэатыўнай і дасціпнай форме. Сёлета папулярнасць канала імкліва вырасла — на яго падпісана 13 000 чал.
«Студэнцкая Думка». Адроджаны часопіс з 2019 цалкам перайшоў у лічбавы фармат, здолеў прыцягнуць 3‑тысячную аўдыторыю, зрабіць вялікі ўнёсак у асвятленне праблемаў студэнцтва. СД паспяхова праводзіць школу журналістыкі для студэнтаў, якая генеруе маладых ды ініцыятыўных журналістаў для грамадскага сектара.
Сайт mspring.online, Магілёў. Часопіс пра чалавека і яго правы. Папулярны рэгіянальны праваабарончы сайт, які асвятляе праблематыку правоў чалавека ў рэгіёне. На сайце публікуюцца важныя навіны, абвесткі, відэа і падкасты.
@bajmedia
