Суд не задаволіў скаргу адваката Паўла Падабеда

Адметна, што скарга слухалася ў закрытым рэжыме, так пастанавіў суддзя Аляксандр Супічэнка. Падобны фармат усё часцей выкарыстоўваецца ў палітычных справах, асабліва калі яны тычацца «экстрэмісцкіх артыкулаў» — маўляў, публічнае разгалошванне звестак супярэчыць абноўленаму заканадаўству. 

Па выніках кулуарнага пасяджэння суд не знайшоў падставаў, каб стаць на бок абвінавачанага, адпаведна, Паўла Падабеда працягнуць трымаць у СІЗА № 1 Мінска.

На пачатку красавіка скончыўся двухмесяцовы тэрмін папярэдняга ўтрымання журналіста пад вартай. Па яго сканчэнні Паўла Падабеда мусілі або вызваліць на падставе няспраўджаных падазрэнняў у здзяйсненні «злачынства», або прызнаць абвінавачаным.

Той факт, што ён застаецца за кратамі, сведчыць пра адно: справа відэааператара будзе накіравана ў суд. Як раней паведамляла Беларуская асацыяцыя журналістаў, яму інкрымінаваны артыкул 361–4 Крымінальнага кодэкса — «садзейнічанне экстрэмісцкай дзейнасці».

Паўла Падабеда затрымалі сёлета 20 студзеня і першапачаткова пакаралі 15 суткамі арышту. Сілавікі ў літаральным сэнсе «адкапалі» спасылкі ў ягоных сацсетках ажно за 2012 год і абвінавацілі ў тыражаванні «экстрэмісцкіх матэрыялаў» — пры тым, што падобных статусаў у незалежных СМІ тады не было.

Суд не стаў разбірацца ў «дробных нюансах» і на падставе адміністрацыйнага артыкула 19.11 пакараў журналіста 15 суткамі арышту з адбыццём у ІЧУ Мінскага раёна.

Аднак напярэдадні меркаванага вызвалення Паўла забралі на допыт, пасля якога ён апынуўся ў следчым ізалятары на вуліцы Валадарскага. І ўжо там прад’явілі «спрыянне экстрэмізму». Канкрэтныя эпізоды пакуль не агалошваюцца, санкцыя артыкула 361–4 прадугледжвае пазбаўленне волі ад 2 да 6 гадоў ці так званую «хімію» на тэрмін да 4 гадоў.

28 лютага праваабарончая супольнасць прызнала Паўла Падабеда палітычным вязнем.

Павел Падабед больш за два дзясяткі гадоў у якасці фатографа і відэааператара супрацоўнічаў з незалежнымі медыя, не маючы праблем з законам. Яго затрымалі 20 студзеня — літаральна за дзень да таго, як ён планаваў на нейкі час выехаць за мяжу. Калегі з гэтага робяць выснову, што за журналістам ужо сачылі, ведаючы пра яго намер пакінуць краіну.   

Чытайце яшчэ:

«Чарговая спроба адарваць ад аўдыторыі». Чаму на асабістыя старонкі журналістаў у сацсетках сталі чапляць экстрэмісцкі цэтлік?

«Для мозга волк в лесу и новость об очередном задержании — похожие события». Врач-психиатр — о хроническом стрессе и том, как с ним жить

Заява аб прызнанні Аляксандра Манцэвіча палітычным зняволеным