Брэсцкі абласны суд не задаволіў скаргу журналіста-фрылансера Яўгена Скрабца

У выніку 13 снежня суддзя абласнога суда Руслана Сянько адхіліла касацыйную скаргу журналіста і пакінула рашэнне райсуда ў сіле.

Суддзя Ленінскага раёна Брэста Святаслаў Каліна прызнаў журналіста-фрылансера вінаватым у парушэнні часткі 2 артыкула 22.9 Кодэкса РБ аб адміністрацыйных правапарушэннях – за супрацоўніцтва з замежным СМІ без акрэдытацыі. Падставай стаў рэпартаж пра пратэст жыхароў Брэста супраць будаўніцтва акумулятарнага завода побач з горадам. Рэпартаж быў змешчаны на сайце “Рацыё Рацыя” пад назвай “Па 10 базавых штрафу за налепкі”.

Сам Яўген Скрабец у працэсе, што адбываўся ў судзе першай інстанцыі, не ўдзельнічаў. Таксама меў песімістычны настрой і наконт вынікаў разгляду касацыйнай скаргі у Брэсцкім аблсудзе:

“Я не спадзяваўся на іншы вердыкт наконт сваёй справы і абскардзіў папярэдняе рашэнне толькі дзеля таго, каб пазней была магчымасць накіраваць скаргу ў Камітэт ААН па правах чалавека, бо лічу ўсе гэтыя прысуды палітычнымі”, – кажа Яўген Скрабец.

На працягу 2018 года брэсцкі журналіст-фрылансер быў агулам аштрафаваны амаль на 1600 рублёў.