Realt.by забараніў незалежным медыям, прызнаным «экстрэмісцкімі», выкарыстоўваць свае матэрыялы

На сайце realt.by, што належыць ТАА «Риэлт Бай», падобнага папярэджання пра забарону на перадрук публікацый медыям, якія прызнаныя «экстрэмісцкімі» рашэннем беларускіх ўладаў, няма.

Інтэрнэт-рэсурс называе сябе «пляцоўкай нерухомасці № 1 Беларусі», дзе ёсць «самая поўная і ўнікальная база аб’ектаў нерухомасці», а таксама «унікальная аналітычная інфармацыя і кантэнт па спадарожных тэмах». Тут насамрэч можна часам прачытаць пра цікавыя аб’екты нерухомасці, выстаўленыя на продаж, альбо пра планы забудовы ў розных населеных пунктах.

Папярэджанне пра забарону выкарыстання матэрыялаў «рэсурсамі, прызнанымі ў Беларусі экстрэмісцкімі», магчыма, звязанае са згадкай праекта Realt у блізкім да беларускіх сілавікоў тэлеграм-канале «Книга ГУ “БАЗА”».

Там 19 лютага з’явілася відэа, узятае з Тik­Tok блогеркі Веранікі Ярашэвіч. Блогерка паведамляе, што зняты ёй відэаролік пра запіс на візу ў візавы цэнтр Іспаніі быў выкарыстаны без яе дазволу на ютуб-канале NEXTA.   Яна даводзіць, што свайго дазволу на гэта ніколі б не дала, бо канал прызнаны ў Рэспубліцы Беларусь экстрэмісцкім.

«Той факт, што я, жывучы ў Беларусі, засвяцілася на экстрэмісцкім канале, мог невядома чым скончыцца. Яны сядзяць у Польшчы, і ім усё адно, а я сяджу ў Беларусі і спрабую тут будаваць сваё жыццё», — гаворыць дзяўчына. Яна сцвярджае, што з яе відэароліка «вырвалі кавалкі» і «сказілі сэнс, бо хацела сказаць зусім не гэта». Напрыканцы блогерка заклікае «больш уважліва ставіцца да навін» і «фільтраваць інфармацыю».

У допісе, які суправаджае гэтае відэа ў блізкім да сілавікоў тэлеграм-канале, гаворыцца, што «польские мерзавцы выдирают из контекста чужие материалы и публикуют их у себя для хайпа. А авторы категорически против в любой форме связываться с экстремистами».

«Хотелось бы услышать подобную принципиальную позицию от Realt, Onlin­er и прочих, чьи материалы постоянно используются в ленте экстремистов. Иначе, придётся разбираться более детально с редакциями на наличие умысла в содействии экстремизму», — пішуць пад відэа сілавікі.

Чытайце яшчэ:

ГУБАЗіК затрымаў вядучую і гукарэжысёра «Альфа радыё»

Журналістку Алену Шабуню судзілі па двух адміністрацыйных артыкулах. Пра суд ёй нават не паведамілі

Нармалізацыя як умова выжывання. Што цяпер асвятляюць «перафарматаваныя» выданні