Пачалася кампанія за ўключэнне беларускай мовы ў абавязковы спіс YouTube

Беларус з Беластока Алег Мамонька распачаў кампанію за ўключэнне беларускай мовы ў абавязковы спіс YouTube. Да яго далучыўся палітык, пісьменнік, публіцыст і былы палітвязень Павел Севярынец.

«Любому карыстальніку будзе дастаткова патраціць пару хвілінаў — і ягоны голас у падтрымку беларусізацыі платформы будзе ўлічаны медыягігантам. Чым больш такіх галасоў мы збярэм — тым хутчэй YouTube загаворыць па-беларуску. Падтрымайма, сябры! Давайце разам даможамся беларускай мовы ў YouTube!» — заклікае Павел Севярынец на сваёй старонцы ў Фэйсбук.

У YouTube ёсць аўтаматычны пераклад і агучка відэа, але беларускай мовы там няма. 

«Чым больш нас заявіць, што яна нам патрэбная, тым большы шанец, што яе дададуць», — адзначае аўтар ініцыятывы Алег Мамонька.

Як далучыцца да кампаніі?

Крок 1. Дадайце беларускую мову ў пажаданыя мовы

• Тэлефон: аватарка → Налады → Мовы → Пажаданыя мовы → адзначце «Беларуская» → Пацвердзіць
• Камп’ютар: аватарка → Налады → Прайграванне → Пажаданыя мовы → Дадаць або змяніць мовы → «Беларуская» → Захаваць

Крок 2. Напішыце YouTube водгук

Аватарка → Даведка/водгук → Адправіць водгук → устаўце тэкст:
Please add Belaru­sian to auto-trans­la­tion and auto-dub­bing. Калі ласка, дадайце беларускую мову ў аўтапераклад і аўтаагучку.

Крок 3. Падзяліцеся допісам і адзначце сяброў у каментарах!