Ананім выклікаў ідэолага, каб перашкодзіць журналісту-фрылансеру

Намеснік старшыні Светлагорскага райвыканкама Канстанцін Пятроўскі на зварот Жукоўскага паведаміў, што Марына Граюшава “14 лістапада 2017 года атрымала ананімны тэлефонны званок наконт правядзення відэаздымкаў і апытання жыхароў вёскі Якімава Слабада. Улічваючы, што ў службовыя абавязкі намесніцы начальніка аддзела ідэалагічнай працы ўваходзіць праца са сродкамі масавай інфармацыі, Граюшава была накіраваная да месца, указанага ананімам”.

Далей куратар аддзела ідэалогіі піша ў электронным адказе на адрас журналіста-фрылансера Жукоўскага:

“Абгрунтаванняў для прыцягнення да адміністрацыйнай адказнасці па пытаннях, указанных у звароце, а таксама фактаў, якія пацвярджаюць дыскрэдытацыю супрацоўніка органаў улады, Светлогорскі раённы выканаўчы камітэт не мае”.

Сам Кастусь Жукоўскі пісаў у райвыканкам, што ў лістападзе Марына Граюшава з невядомай жанчынай тры гадзіны пераследавала яго на аўтамабілі “Міцубісі”.

“У Якімавай Слабадзе дапытваліся ў людзей, на якой вуліцы я стаяў, з кім размаўляў. Я пераходжу вуліцу, і яны туды едуць, я выпраўляюся ў Светлагорск — яны следам.

Калі я вырашыў зняць пераследвальнікаў, Граюшава рэзка адчыніла дзверы і напала на мяне: пачала хапаць за вопратку, відэакамэру, стала рукамі наносіць удары. Адламала ад відэакамеры запчастку. Я закрываўся штатывам.

Пра ўсё гэта я напісаў у электроным звароце ў райвыканкам, прасіў  прыцягнуць Граюшаву да адміністрацыйнай адказнасці, але атрымаў адпіску”, — распавядае фрылансер Жукоўскі.

На яго думку, намесніца начальніка аддзела ідэалогіі паводзіла сябе па-хуліганску, і гэта зафіксавана на відэа- і фотаздымках.

“Я не збіраюся задавольвацца адпіскай намесніка старшыні райвыканкама — абскарджу яе ў Гомельскі аблвыканкам. Бо паводзіны Граюшавай ніяк не стасуюцца з дзяржаўнай службай”, — кажа журналіст-фрылансер Жукоўскі.