• Актуальнае
  • Медыяправа
  • Карыснае
  • Накірункі працы і кампаніі
  • Агляды і маніторынгі
  • Рэкамендацыі па бяспецы калег

    У цягніку, на якім журналістка «Белсату» ехала ў Вільню, знайшлі выбухоўку

    Пасля памежнага кантролю на беларуска-літоўскай мяжы пасажыраў цягніка вывелі з вагонаў.

    16 верасня пасажыраў цягніка «Менск – Вільня» высадзілі на станцыі Гудагай у сувязі з замініраваннем.

    «Цягнік «Менск – Вільня», на якім я еду, затрымалі па тэхнічных прычынах. Высадзілі ўсіх пасажыраў. Спачатку вывелі ўсіх пасажыраў з майго вагону, потым яшчэ з аднаго, а потым – увесь цягнік», – паведаміла Чайчыц рэдакцыі.

    Паводле журналісткі, на месца прыбылі ратаўнікі, «хуткія», міліцыянты ў бронекамізэльках. Аперацыя распачалася пасля праверкі дакументаў на станцыі «Гудагай». Ані памежнікі, ані праваахоўнікі не каментуюць сітуацыю. Пасажырам паведамілі, што іх адправяць на наступным цягніку.

    Пазней памежнікі распавялі, што ў адным з вагонаў знайшлі скрыню з выбухоўкай. Цягнік адцягнулі ад станцыі.

    Пасажыры цягніка «Менск – Вільня» на станцыі Гудагай. Фота – Вольга Чайчыц / Белсат

    Пасля гэтага людзям сказалі, што наступны цягнік таксама «затрымліваецца».

    «Сказалі, што наступны цягнік будзе не хутка. Чакаюць спецыялістаў з Менску ці Горадні», – распавядае Чайчыц.

    Вольга дадае, што не ведае дакладна, ці затрыманне цягніка звязанае з тым, што яна ехала на ім.

    Журналістку Вольгу Чайчыц, якая супрацоўнічае з нашым каналам, улады кожны месяц штрафуюць за гэтую супрацу. Агульная сума сёлетніх штрафаў склала ўжо Br 8330 – і працягвае расці.

    У аўторак судовая выканаўца паведаміла Чайчыц аб абмежаванні выезду з краіны — беспадстаўным, бо ўсе штрафы журналістка своечасова аплочвае.

    У сераду дзякуючы ўмяшанню юрыдычнага аддзелу Беларускай асацыяцыі журналістаў, судвыканаўца была вымушаная адклікаць забарону на выезд.

    Суддзя Дзяржынскага суда падцвердзіла, што Вольга Чайчыц свабодная ў праве перамяшчэння.

    На наступным тыдні ў Вольгі Чайчыц запланаваныя сустрэчы ў Брусэлі — у Еўрапарламенце і Еўракамісіі, і ў Парыжы – з Міжнароднай федэрацыяй журналістаў і «Рэпарцёрамі без межаў» адносна сітуацыі са свабодай медыяў ў Беларусі.

    Upd. Вольга даехала таксоўкаю да аэрапорта і паспела на самалёт.

    Самыя важныя навіны і матэрыялы ў нашым Тэлеграм-канале — падпісвайцеся!
    @bajmedia
    Найбольш чытанае
    Кожны чацвер мы дасылаем на электронную пошту магчымасці (гранты, вакансіі, конкурсы, стыпендыі), анонсы мерапрыемстваў (лекцыі, дыскусіі, прэзентацыі), а таксама самыя важныя навіны і тэндэнцыі ў свеце медыя.
    Падпісваючыся на рассылку, вы згаджаецеся з Палітыкай канфідэнцыйнасці